लालबागचा राजा विसर्जन मिरवणुकीत चोरांनी १०० मोबाईल अन् सोन्याच्या चेन केल्या लंपास; चार आरोपींना अटक

मुंबईत लालबागचा राजा गणेश विसर्जन मिरवणुकीत लाखो भाविक जमले होते, पण या गर्दीत चोरट्यांनी अनेकांचे मोबाईल आणि सोन्याच्या चेन लंपास केल्याची घटना समोर आली.

काल लालबागच्या राजाचे मोठ्या उत्साहात विसर्जन झाले. या गणेश विसर्जन मिरवणुकीत लाखो भाविकांनी गर्दी केली होती. लालबाग ते गिरगाव चौपाटी पर्यंत ही मिरवणूक या सुमारे ३२ ते ३५ तास चालली. या गर्दीचा फायदा अनेक चोरट्यांनी घेतल्याचे दिसत आहे. आतापर्यंत १०० मोबाईल आणि अनेक सोन्याच्या चेन चोरीला गेल्या आहेत. 

मेहुल चोक्सीला जेलमध्ये स्वच्छ पाणी अन् टॉयलेट देणार; भारताने बेल्जियमला दिली १४ सुविधांची यादी

पोलिसांनी दिलेल्या माहितीनुसार, या वर्षी मिरवणुकीदरम्यान मोबाईल फोन चोरीच्या १०० हून अधिक घटना घडल्या. कालाचौकी पोलिस ठाण्याबाहेर तक्रारी नोंदवण्यासाठी भाविकांच्या लांबच लांब रांगा दिसून आल्या. आतापर्यंत १० गुन्हे अधिकृतपणे नोंदवण्यात आले आहेत, त्यापैकी ४ चोरीचे फोन जप्त करण्यात आले आहेत, या प्रकरणांमध्ये चार आरोपींना अटक करण्यात आली आहे.

मोबाईल चोरी व्यतिरिक्त, मोठ्या प्रमाणात सोनसाखळी चोरीच्या घटना घडल्या आहेत. ७ गुन्हे दाखल करण्यात आले आहेत. दोन सोनसाखळ्या जप्त करण्यात आल्या आहेत आणि १२ आरोपींना ताब्यात घेण्यात आले आहे. मुंबईच्या भोईवाडा पोलिसांनी ड्रोनच्या वापराशी संबंधित गुन्हे देखील दाखल केले आहेत.

आतापर्यंत मोबाईल चोरीच्या प्रकरणांमध्ये ४ आरोपींना अटक करण्यात आली आहे, तर चेन स्नॅचिंग प्रकरणात १२ जणांना ताब्यात घेण्यात आले आहे. १०० हून अधिक मोबाईल चोरीच्या तक्रारी प्राप्त मिळाल्या आहेत. दरवर्षीप्रमाणे, विसर्जन मिरवणुकीत, विशेषतः लालबाग परिसरात, मोबाईल चोर आणि चेन स्नॅचर्सच्या संघटित टोळ्या सक्रिय होत्या. 

गणेशोत्सवादरम्यान कडक सुरक्षा व्यवस्था आणि पोलिसांचा बंदोबस्त असूनही, या घटनांमुळे गंभीर चिंता निर्माण झाली आहे. पोलिसांनी नागरिकांना सतर्क राहण्याचे आणि अशा गर्दीच्या धार्मिक कार्यक्रमांना उपस्थित राहताना त्यांचे मोबाईल फोन, दागिने आणि मौल्यवान वस्तू सुरक्षित ठेवण्याचे आवाहन केले आहे.