देशाच्या नौदलाचे बळ वाढले! तारागिरी युद्धनौकेचे जलावतरण, निलगिरी वर्गातील चौथी प्रगत स्वदेशी 'स्टील्थ फ्रिगेट' ताफ्यात दाखल

युद्धनौकेच्या डिझाइन आणि बांधकामातील आत्मनिर्भरतेच्या दिशेने झालेल्या महत्त्वपूर्ण प्रगतीचे हे मोठे पाऊल आहे. वॉरशिप डिझाइन ब्युरोने याचे डिझाइन केले असून, वॉरशिप ओव्हरसिंग टीमच्या देखरेखीखाली 'इंटिग्रेटेड कन्स्ट्रक्शन' पद्धतीने बांधण्यात आले.

मुंबई : भारतीय नौदलाच्या आत्मनिर्भरतेच्या वाटचालीतील महत्त्वाचा टप्पा गाठत माझगाव डॉक शिपबिल्डर्स लिमिटेडने बांधलेल्या निलगिरी वर्गातील (प्रोजेक्ट १७ ए) चौथे प्रगत स्टील्थ फ्रिगेट 'तारागिरी' युद्धनौकेचे शनिवारी जलावतरण करण्यात आले.

युद्धनौकेच्या डिझाइन आणि बांधकामातील आत्मनिर्भरतेच्या दिशेने झालेल्या महत्त्वपूर्ण प्रगतीचे हे मोठे पाऊल आहे. प्रकल्प १७ ए मधील युद्धनौका विविध प्रकारच्या मोहिमांसाठी तयार केलेल्या असून, सागरी क्षेत्रातील सर्व आव्हानांना तोंड देण्यासाठी त्यांची रचना करण्यात आली आहे. 

'तारागिरी' भारतीय नौदलात १९८० ते २०१३ दरम्यान ३३ वर्षे सेवा देणाऱ्या लेअँडर-श्रेणीतील माजी आयएनएस तारागिरीचे नवे रूप आहे. नव्या पिढीची ही अत्याधुनिक युद्धनौका नौदल डिझाइन, स्टेल्थ, अग्निशक्ती, स्वयंचलन आणि टिकाऊपणाच्या क्षमतेतील एक मोठी झेप दर्शवते. 

वॉरशिप डिझाइन ब्युरोने याचे डिझाइन केले असून, वॉरशिप ओव्हरसिंग टीमच्या देखरेखीखाली 'इंटिग्रेटेड कन्स्ट्रक्शन' पद्धतीने बांधण्यात आले.

सागरी भविष्याच्या दृष्टीने मोठे पाऊल

'तारागिरी'मुळे भारताचे डिझाइन, अभियांत्रिकी व जहाजबांधणी कौशल्य अधोरेखित झाले. या प्रकल्पात सुमारे। हजार थेट तसेच १० हजार अप्रत्यक्ष रोजगारनिर्मिती झाली आहे. भारतीय नौदलाच्या अत्याधुनिक, बहुउपयोगी, स्टील्थ युद्धनौकांच्या मालिकेत 'तारागिरी'ची भर पडणे ही सुरक्षित आणि स्वावलंबी सागरी भविष्याच्या दृष्टीने मोठे पाऊल मानले जात आहे.

पाणबुडीविरोधी युद्धासाठी सज्जता

शस्त्रास्त्र आणि सेन्सर्स संचामध्ये ब्राह्मोस सुपरसॉनिक क्षेपणास्त्रे -एमएफएस्टार रडार आणि एमआरएसएएम क्षेपणास्त्र प्रणाली, ७६ एमएम एसआरजीएम तोफ, ३० एमएम आणि १२.७ एमएम क्लोज-इन वेपन सिस्टीमचा समावेश आहे. याशिवाय पाणबुडीविरोधी युद्धासाठी रॉकेट आणि टॉर्पेडोदेखील जहाजावर बसवलेले आहेत.

अत्याधुनिक युद्धनौकेत शिवालिक श्रेणीपेक्षा अधिक उन्नत शस्त्रास्त्रे आणि सेन्सर तंत्रज्ञानाचा समावेश आहे. पहिल्या दोन पी १७ ए युद्धनौकांच्या बांधणीतील अनुभवामुळे 'तारागिरी'च्या बांधणीचा कालावधी २३ महिन्यांवरून ८१ महिन्यांपर्यंत कमी करण्यात नौदल आणि एमडीएलला यश आले.