युद्धाच्या झळा कष्टकऱ्यांच्या ताटापर्यंत; चहा, थाळी महागली! वडापाव, दाबेली, फ्रँकीच्या दरात ५ ते १० रुपयांची वाढ

गेल्या आठवडाभरात मोमोज, फ्रँकी आणि दाबेलीच्या दरात ५ ते १० रुपयांची वाढ झाली आहे.

घन:श्याम सोनार -

मुंबई : रशिया-युक्रेन युद्धाच्या ढगांमुळे निर्माण झालेली महागाई थेट मुंबईतील कष्टकरी जनतेच्या ताटापर्यंत पोहोचली आहे. व्यावसायिक गॅस सिलिंडरच्या तीव्र टंचाईमुळे शहरातील रस्त्यांवरील खाद्यपदार्थ विक्रेते अडचणीत सापडले असून, चहाच्या कटिंगपासून ते जेवणाच्या थाळीपर्यंत सर्वच पदार्थ महागले आहेत. गेल्या आठवडाभरात मोमोज, फ्रँकी आणि दाबेलीच्या दरात ५ ते १० रुपयांची वाढ झाली आहे.

गॅससाठी मोजावे लागतायत जादा पैसे -
मुलुंड, करी रोड आणि उपनगरांमध्ये व्यावसायिक गॅस सिलिंडर वेळेवर उपलब्ध होत नसल्याने छोटे विक्रेते हवालदिल झाले आहेत. मुलुंड येथील दाबेली विक्रेते दामोदर यांनी सांगितले की, ८ दिवसांपासून गॅस बुक करूनही मिळत नाही. करी रोड येथील मुकुंद घोसाळकर यांच्या मते, गॅसचा पुरवठा कमी असल्याने उत्पादनावर परिणाम झाला असून वेळ आणि खर्च दोन्ही वाढत आहेत.

गॅस टंचाई कायम राहिल्यास...
चहा विक्रेते हरीश मेणा यांनी सांगितले की, कटिंग १० तर फुल २० रुपये कायम ठेवले; गॅसटंचाई अशीच राहिली तर २ रुपये वाढ करावी लागेल. तेलाच्या किमती वाढल्याने खाद्यपदार्थांचे दरही वाढण्याची शक्यता आहे. काही भागांत चहाच्या दरात २ रुपयांची वाढ झाली आहे.