‘त्या’ अध्यक्षांची हायकोर्टात अटकपूर्व जामिनासाठी धाव

विशेष न्यायालयाने अटकपूर्व जामीन नाकारल्यानंतर दोघांनी उच्च न्यायालयात अटकपूर्व जामिनासाठी याचिका दाखल केली.

मुंबई : दोन अल्पवयीन मुलींवर लैंगिक अत्याचार झालेल्या बदलापूरमधील ‘त्या’ शाळेचे अध्यक्ष व सचिव यांनी अटकपूर्व जामिनासाठी उच्च न्यायालयात धाव घेतली. मुलींवर झालेल्या अत्याचाराबाबत पोलिसांकडे तक्रार न केल्याबद्दल अध्यक्ष व सचिवांवर पॉक्सोअंतर्गत गुन्हा दाखल करण्यात आला आहे. विशेष न्यायालयाने अटकपूर्व जामीन नाकारल्यानंतर दोघांनी उच्च न्यायालयात अटकपूर्व जामिनासाठी याचिका दाखल केली. न्या. आर. एन. लड्डा यांच्या एकलपीठापुढे सोमवारी या याचिकांवर सुनावणी सुरू होती. याचिकेवरील सुनावणी १ ऑक्टोबर रोजी ठेवली. बदलापूरपोलिस या प्रकरणाचा तपास करत होते. त्यानंतर, राज्य सरकारने तपासासाठी एसआयटी नेमली. उच्च न्यायालयानेही याप्रकरणाची स्वयंप्रेरणेने जनहित याचिका करून घेतली आहे.