मुंबई: सह्याद्री अतिथीगृहासमोर BEST बसची कारला जोरदार धडक, महिलेचा चिरडून मृत्यू

Mumbai BEST Accident : मुंबईच्या उच्चभ्रू परिसरात घडला अंगावर काटा आणणारा अपघात

Mumbai BEST Accident : गेल्या काही दिवसांत मुंबईतील बेस्ट बसच्या अपघातांच्या अनेक घटना समोर आल्या आहेत. कुर्ला स्टेशनजवळ बेस्ट बसने अनेकांना चिरडल्याची घटना अजूनही साऱ्यांच्या लक्षात आहे. तशातच मंगळवारी सकाळी बेस्ट बसच्या आणखी एका अपघाताची घटना घडली. मुंबईतील उच्चभ्रू परिसर आणि सरकारी मंडळींची वर्दळ असलेल्या सह्याद्री अतिथीगृहाजवळ एक भीषण अपघात झाला. बेस्टच्या इलेक्ट्रिक बसने रस्त्यावर एकाजागी उभ्या असलेल्या कारला जोरदार धडक दिली. या धडकेची तीव्रता इतकी होती की बस आणि कारच्या मध्ये आलेल्या एका पादचारी महिलेला जबर मार लागला ती गंभीर जखमी झाली. महिलेला शक्य तितक्या लवकर जवळच्या जे. जे. रुग्णालयात नेण्यात आले, पण डॉक्टरांनी तिला मृत घोषित केले. तिचा जागीच मृत्यू झाला असल्याची माहिती देण्यात आली.

कसा झाला अपघात?

मंगळवारी सकाळी बेस्टच्या १०५ क्रमांकाची इलेक्ट्रिक बस विजय वल्लभ चौकाकडून कमला नेहरू पार्ककडे जात असताना सकाळी ९ वाजून १० मिनिटांनी हा अपघात घडला. बस घटनास्थळी पोहचल्यावर अचानक मोठा आवाज झाल्याने बस चालक बसमधून उतरला आणि पाहिल्यावर महिलेला डोक्याला मार लागला होता. डाव्या बाजूला असलेल्या पार्किंग केलेल्या गाडीचेही नुकसान झाले होते. बस आणि मोटारगाडीमध्ये चिरडून एका पादचारी महिलेचा जागीच मृत्यू झाल्याची माहिती प्रत्यक्ष उपस्थित असणाऱ्यांनी दिले. पोलिसांनी अपघातानंतर तात्काळ स्वतःच्या मोबाइल व्हॅनमधून महिलेला जे जे रुग्णालयात नेले.

मॉर्निंग वॉक करताना अपघातात मृत्यू

ती महिला रुग्णालयात पोहोचली पण तिचा आधीच मृत्यू झाला असल्याचे डॉक्टरांनी सांगितले. महिलेचे नाव निता शहा असून त्या रिज रोडवरील प्रकाश बिल्डिंग येथील रहिवाशी असल्याचे सांगितले जात आहे. मात्र तेथील उपस्थित डॉक्टर स्नेहल जाधव यांनी महिलेला मृत घोषित केले. ही इलेक्ट्रिक बस ईव्ही ट्रान्स कंपनीची भाडे तत्वावरील बस असून या प्रकरणी पोलीस अधिक चौकशी करीत आहेत.