अग्निशमन’च्या बचावकार्यात बेकायदा पार्किंगमुळे अडथळा आल्यास थेट गुन्हा

आग किंवा अन्य आपत्कालीन घटनेच्या वेळी बचावकार्यात वाहनांच्या बेकायदा पार्किंगमुळे अग्निशमन दलास अडथळे येत आहेत. त्यामुळे घटनास्थळी अडथळा निर्माण झाल्यास संबंधित वाहनमालकांवर पोलिस ठाण्यात थेट ‘एफआयआर’ नोंदविण्याचा निर्णय पालिकेने घेतला आहे.

लोकमत न्यूज नेटवर्क
मुंबई: आग किंवा अन्य आपत्कालीन घटनेच्या वेळी बचावकार्यात वाहनांच्या बेकायदा पार्किंगमुळे अग्निशमन दलास अडथळे येत आहेत. त्यामुळे घटनास्थळी अडथळा निर्माण झाल्यास संबंधित वाहनमालकांवर पोलिस ठाण्यात थेट ‘एफआयआर’ नोंदविण्याचा निर्णय पालिकेने घेतला आहे.

पालिका आयुक्त  भूषण गगराणी, अतिरिक्त आयुक्त डॉ. अश्विनी जोशी यांनी कारवाईचे स्पष्ट निर्देश दिले आहेत. दुर्घटनास्थळी बचाव कार्यास जाताना अग्निशमन दलास अनेक अडचणींचा सामना करावा लागतो. रस्त्यांच्या कडेला  अनेक वाहने बेकायदा उभी  केलेली असतात. त्यामुळे जीवित व वित्तहानी वाढण्याची भीती असते. अशा वाहनांमुळे अग्निशमन कार्यात विलंब झाल्याचे आढळल्यास  अग्निशमन वाहनावरील अधिकारी किंवा कर्मचाऱ्याने अग्निशमनचे कार्य पूर्णपणे संपल्यानंतर बचावकार्यात अडथळा निर्माण करणाऱ्या वाहनांचे नोंदणी क्रमांकासह छायाचित्रे काढून वरिष्ठांच्या परवानगीने संबंधित पोलिस ठाण्यात  एफआयआर  नोंदवावा, असे निर्देश आयुक्तांनी दिले.

...तर नागरिकांची तक्रार पोलिसांकडे करणार वर्ग

या कारवाईमुळे बेकायदा पार्किंगबाबत नागरिकांकडूनही अग्निशमन दलाकडे तक्रार येण्याची आहे. त्याकरिता प्रशासनाने कार्यप्रणाली ठरविली आहे. अशाप्रकारच्या बेकायदा पार्किंगबाबत जर नागरिकांनी तक्रार केली, तर संभाव्य तक्रार संबंधित पोलिस ठाणे, वाहतूक पोलिस विभाग व संबंधित विभाग कार्यालयाकडे  वर्ग करून तक्रारदारास माहिती देण्याचे निर्देशही अग्निशमन दलास दिले आहेत. अग्निशमन दल वेळीच घटनास्थळी न पोहोचल्यास हानी वाढण्याची भीती असते.