विमानतळावर ३८ कोटींच्या सोने तस्करीचा पर्दाफाश; DRI कडून केनियाच्या २६ नागरिकांना अटक

२९ किलो वजनाचे सोन्याचे बार सापडले

लोकमत न्यूज नेटवर्क, मुंबई: मुंबई विमानतळावर केंद्रीय महसूल गुप्तचर यंत्रणेच्या (डीआरआय) अधिकाऱ्यांनी धडक कारवाई करत तब्बल ३८ कोटी रुपयांच्या सोने तस्करीचा पर्दाफाश केला आहे. या प्रकरणी केनियाच्या २६ नागरिकांना अटक करण्यात आली आहे. अलीकडच्या काळात डीआरआयने केलेली ही सर्वात मोठी कारवाई आहे. 

नैरोबी येथून एका मोठा ग्रुप मुंबईत येत असून, त्यांच्याकडे मोठ्या प्रमाणावर सोने असल्याची विशिष्ट माहिती डीआरआय अधिकाऱ्यांकडे होती. त्यानुसार, केक्यू २०२ या विमानाच्या बाहेर अधिकाऱ्यांनी सापळा रचला होता. या ग्रुपमध्ये मोठ्या प्रमाणावर ज्येष्ठ नागरिक महिला होत्या. अधिकाऱ्यांनी त्यांना ग्रीन चॅनलमधून बाहेर पडू दिले, असे अधिकाऱ्यांनी सांगितले.

२९ किलो वजनाचे सोन्याचे बार

ग्रीन चॅनलमधून बाहेर पडल्यानंतर त्यांची चौकशी केली असता त्यांच्याकडील सामानात २९ किलो वजनाचे सोन्याचे बार आढळून आले. अटक करण्यात आलेल्या २५ जणांनी आपण तस्करी केली नसल्याचा दावा केला, तर एका व्यक्तीकडे बनावट पासपोर्ट असल्याने त्याला अटक करण्यात आली. मात्र त्यांच्या सामानात सोने आढळल्यानंतर त्यांना डीआरआयच्या अधिकाऱ्यांनी अटक केली.