बारामती, राहुरी विधानसभा पोटनिवडणूकही जाहीर; २३ एप्रिल रोजी मतदान, ४ मे रोजी मतमोजणी; अजित पवार यांच्या जागी कोण आमदार?

अजित पवार यांचे २८ जानेवारीला विमान अपघातात निधन झाल्याने बारामती विधानसभा मतदारसंघाची जागा रिक्त झाली होती. तर राहुरी विधानसभा मतदारसंघाचे भाजपचे आमदार शिवाजी कर्डिले यांचे गेल्यावर्षी ऑक्टोबर महिन्यात निधन झाले होते.

मुंबई : निवडणूक आयोगाने रविवारी राज्यातील बारामती व राहुरी विधानसभा मतदारसंघासाठी पोटनिवडणूक जाहीर केली. या दोन्ही विधानसभा मतदारसंघात २३ एप्रिल रोजी पोटनिवडणूक होणार असून ४ मे रोजी मतमोजणी होणार आहे. ३० मार्चला अधिसूचना जारी केली जाणार आहे.

अजित पवार यांचे २८ जानेवारीला विमान अपघातात निधन झाल्याने बारामती विधानसभा मतदारसंघाची जागा रिक्त झाली होती. तर राहुरी विधानसभा मतदारसंघाचे भाजपचे आमदार शिवाजी कर्डिले यांचे गेल्यावर्षी ऑक्टोबर महिन्यात निधन झाले होते.

अजित पवार यांच्या जागी कोण आमदार?
अजित पवार यांच्या निधनानंतर त्यांच्या पत्नी सुनेत्रा पवार यांनी उपमुख्यमंत्रिपदाची सूत्रे हाती घेतली आहेत. त्यांना विधानसभा अथवा विधानपरिषदेपैकी एका सभागृहाचे सदस्य होणे आवश्यक आहे. त्यामुळे बारामतीची पोटनिवडणूक त्या लढविणार आहेत. बारामतीची पोटनिवडणूक बिनविरोध होण्याची दाट शक्यता आहे.

राहुरी विधानसभेसाठी कर्डिले यांचे पुत्र अक्षय कर्डिले यांना भाजप उमेदवारी देण्याची शक्यता आहे. शरद पवार गटाकडून माजी आमदार प्राजक्त तनपुरे निवडणूक लढण्याची शक्यता आहे.