अनिल देशमुख यांची चौकशी सुरूच; सीबीआयला पुन्हा मिळाली परवानगी

१०० कोटींच्या वसुलीच्या आरोप प्रकरणात सीबीआयला अनिल देशमुख यांच्याकडे पुन्हा एकदा चौकशी करण्यास परवानगी मिळाली आहे.

लोकमत न्यूज नेटवर्क

मुंबई : माजी पोलीस आयुक्त परमबीर सिंह यांनी माजी गृहमंत्री अनिल देशमुख यांनी केलेल्या १०० कोटींच्या वसुलीच्या आरोप प्रकरणात सीबीआयला देशमुख यांच्याकडे पुन्हा एकदा चौकशी करण्यास परवानगी मिळाली आहे. त्यानुसार गुरुवारपासून सीबीआयने आर्थर रोड कारागृहात देशमुख यांच्याकडे चौकशीला सुरुवात केली आहे. शुक्रवारी पथक पुन्हा आर्थर रोड कारागृह गाठून देशमुख यांची चौकशी केली. 

माजी पोलीस आयुक्त परमबीर सिंह यांनी केलेल्या १०० कोटींच्या वसुलीच्या आरोप प्रकरणात ईडीने देशमुख यांच्याविरोधात मनी लाँड्रिंगचा गुन्हा नोंदविला होता. या गुन्ह्यात देशमुखांना अटक करण्यात आली. दुसरीकडे चांदीवाल आयोगासमोरील चौकशीदेखील अंतिम टप्प्यात आहे. यातच सीबीआयने त्यांच्याकडे पुन्हा चौकशी करण्यासाठी परवानगी द्यावी, याबाबत सत्र न्यायालयात अर्ज केला होता. 
सत्र न्यायालयाकडून ३ ते ६ तारखेपर्यंत चौकशी करण्यास परवानगी मिळाली आहे. त्यानुसार गुरुवारी सीबीआयचे पथक आर्थर रोड कारागृहात त्यांच्याकडे चौकशीसाठी गेले होते. शुक्रवारी पुन्हा पथक कारागृहात दाखल झाले. त्यांच्याकडे चौकशी करत त्यांचा जबाब नोंदवण्यात येत आहे.