महापोर्टल बंद करुन नवीन पोर्टल सुरु करा; सुप्रिया सुळेंची मुख्यमंत्र्यांकडे मागणी

राष्ट्रवादी काँग्रेसच्या खासदार सुप्रिया सुळे यांनी महापोर्टल बंद करुन चांगले पोर्टल सुरु करण्याची विनंती मुख्यमंत्री उद्धव ठाकरे यांच्याकडे केली आहे.

मुंबई: राज्य शासनाच्या विविध विभागांच्या नोकरभरतीच्या परीक्षा महापोर्टलवर ऑनलाईन पद्धतीने घेतल्या जात आहे. मात्र या महापोर्टलबाबत अनेक तक्रारी दाखल करण्यात आल्या आहेत. याबाबत राष्ट्रवादी काँग्रेसच्या खासदार सुप्रिया सुळे यांनी महापोर्टल बंद करुन चांगले पोर्टल सुरु करण्याची विनंती मुख्यमंत्री उद्धव ठाकरे यांच्याकडे केली आहे.

सुप्रिया सुळे म्हणाल्या की, मी मुख्यमंत्र्यांना रोजगाराच्या संधी उपलब्ध करून देणारे 'महापोर्टल' रद्द करण्याची विनंती केली आहे. पोर्टलच्या अयोग्य कामकाजाच्या बर्‍याच तक्रारी आल्या असल्याने आम्ही नवीन पोर्टल सुरु करण्याची विनंती केली आहे. तसेच शिवसेनेचे आमदार आदित्य ठाकरे यांनी देखील या मागणीला पाठिंबा दिला असल्याचे सुप्रिया सुळे यांनी यावेळी सांगितले. ३ डिसेंबर रोजी जागतिक अपंग दिन आहे. काही राज्यांमध्ये त्यासाठी मंत्रालयात वेगळा विभाग आहे. त्यामुळे राज्यातील दिव्यांग व ज्येष्ठ नागरिकांसाठी सामाजिक न्याय विभागांतर्गत मंत्रालयात स्वतंत्र विभाग स्थापन करावा, अशी मागणी देखील सुप्रिया सुळे यांनी मुख्यमंत्री उद्धव ठाकरे यांच्याकडे केली आहे.

शासकीय नोकरभरतीसाठी यापुर्वीच्या सरकारने सुरु केलेले महापोर्टल बंद करावे,अशी मागणी मुख्यमंत्री उद्धवजी ठाकरे यांच्याकडे केली.या सेवेत पारदर्शकता नाही अशी उमेदवारांची तक्रार असून पात्र उमेदवारांवरही अन्याय होतोय.त्यामुळे ते बंद व्हावे ही मागणी मुख्यमंत्र्यांकडे केली@CMOMaharashtrapic.twitter.com/YTVbbkL9iZ

— Supriya Sule (@supriya_sule) December 1, 2019

दिव्यांगांसाठी सचिव ते जिल्हास्तरावर सामाजिक न्याय विभागाच्या अखत्यारीत वेगळा विभाग निर्माण करावा आणि महापोर्टल बंद करावे या मागण्यांसाठी @CMOMaharashtra यांच्याकडे वेळ मागितली होती.त्यांनी आम्हाला वेळ देऊन आमचे म्हणणे ऐकून घेतले याबद्दल त्यांचे आभार. धन्यवाद. pic.twitter.com/Yqvgf6EJQR

— Supriya Sule (@supriya_sule) December 1, 2019

महायुती सरकारने महापोर्टल सेवा सुरू केली होती. त्याविरोधात अनेक तक्रारी दाखल करण्यात आल्या होत्या. त्याचप्रमाणे राज्यभरात ठिकठिकाणी महासेवा पोर्टलविरोधात आंदोलन देखील करण्यात आले होते. निवडणुकी आधी सुप्रिया सुळे यांनी संवाद यात्रा काढत राष्ट्रवादी काँग्रेस सत्तेत आल्यास महापोर्टल बंद करणार असल्याचे आश्वासन देखील दिले होते.