२९ महानगरपालिकांसाठी १५,९३१ उमेदवार रिंगणात; मुंबईत सर्वाधिक १७००, इचलकरंजीमध्ये सर्वात कमी

अनेक ठिकाणी तिरंगी, चौरंगी वा बहुरंगी लढती होणार आहेत.

लोकमत न्यूज नेटवर्क, मुंबई : राज्यातील २९ महापालिकांसाठी १५ जानेवारीला होणाऱ्या निवडणुकीत २,८६९ नगरसेवक निवडून दिले जाणार आहेत. त्यासाठी १५,९३१ उमेदवार रिंगणात आहेत. अनेक ठिकाणी तिरंगी, चौरंगी वा बहुरंगी लढती होणार आहेत. राज्य निवडणूक आयोगाने अंतिमत: किती उमेदवार रिंगणात आहेत, याची अधिकृत आकडेवारी शनिवारी दिली. 

मुंबईमध्ये २२७ जागांसाठी १७०० उमेदवार रिंगणात असून, सर्वात कमी म्हणजे २३० उमेदवार इचलकरंजीमध्ये आहेत. तेथे ६५ जागांसाठी मतदान होत आहे. इचलकरंजी आणि जालना महापालिकेत पहिल्यांदाच निवडणूक होत आहे. 

मुंबईनंतर उमेदवारांचा हजाराचा आकडा पार केला आहे तो पुणे शहराने. तेथे १६५ जागांच्या निवडणुकीत ९६८ उमेदवारांनी माघार घेऊनदेखील ११६६ उमेदवार भाग्य आजमावत आहेत. उपराजधानी नागपुरात १५१ नगरसेवक निवडून दिले जाणार असून, तेथे ९९३ उमेदवार लढत आहेत. 

 

२९ महापालिकांसाठी एकूण ३३,४२७ उमेदवारी अर्ज दाखल करण्यात आले होते. त्यातील २४,७७१ उमेदवारांचे अर्ज वैध ठरले. ८,८४० उमेदवारांनी त्यांचे अर्ज मागे घेतले.  माघार घेतलेल्या उमेदवारांबाबत छत्रपती संभाजीनगरने मुंबईला मागे टाकले आहे. मुंबईत ४५३ उमेदवारांनी माघार घेतली तर छत्रपती संभाजीनगरमध्ये ५५२ जणांनी माघार घेतली. तथापि, राज्यात सर्वाधिक उमेदवारांनी माघार घेतली ती पुण्यात. तेथे तब्बल ९६८ जणांनी माघार घेतली.

बिनविरोधांचे काय होणार?

राज्यात ७० नगरसेवक बिनविरोध निवडून आल्यावरून सध्या आरोप-प्रत्यारोप होत आहेत. या बिनविरोध निवडी निवडणूक आयोगाने कायम ठेवल्या तर निवडणूक पार पडल्यानंतर निवडणूक याचिकेच्या संदर्भात दाद मागता येईल.

कायदेविषयक जाणकारांच्या मते माघारीसाठी दबाव आणला गेला हे पुराव्याने सिद्ध करणे तेवढे सोपे नाही. शिवाय नगरसेवकपदाची मुदत संपण्याच्या आधी न्यायालयाचा निकाल न येणे ही खात्रीशीर शक्यता असून ती पूर्वानुभवावर आधरित आहे. मात्र, बिनविरोध निवडीबाबत आयोगाची भूमिका ही सर्वात महत्त्वाची असेल.

महापालिकानिहाय प्रभाग, सदस्य व अंतिम उमेदवार संख्या

अ.क्र.	महानगरपालिकेचे नाव	प्रभाग संख्या	सदस्य संख्या	अंतिम उमेदवार
१	बृहन्मुंबई	२२७	२२७	१७००
२	छत्रपती संभाजीनगर	२९	११५	८५९
३	नवी मुंबई	२८	१११	४९९
४	वसई–विरार	२९	११५	५४७
५	कोल्हापूर	२०	८१	३२७
६	कल्याण–डोंबिवली	३१	१२२	४८९
७	ठाणे	३३	१३१	६५६
८	उल्हासनगर	२०	७८	४३२
९	नाशिक	३१	१२२	७३५
१०	पुणे	४१	१६५	११६६
११	पिंपरी–चिंचवड	३२	१२८	६९२
१२	सोलापूर	२६	१०२	५६४
१३	अकोला	२०	८०	४६९
१४	अमरावती	२२	८७	६६१
१५	नागपूर	३८	१५१	९९३
१६	चंद्रपूर	१७	६६	४५१
१७	लातूर	१८	७०	३५९
१८	परभणी	१६	६५	४११
१९	भिवंडी–निजामपूर	२३	९०	४३९
२०	मालेगाव	२१	८४	३०१
२१	पनवेल	२०	७८	२५५
२२	मीरा–भाईंदर	२४	९५	४३५
२३	नांदेड–वाघाळा	२०	८१	४९१
२४	सांगली–मिरज–कुपवाड	२०	७८	३८१
२५	जळगाव	१९	७५	३३३
२६	धुळे	१९	७४	३२०
२७	अहिल्यानगर	१७	६८	२८३
२८	इचलकरंजी	१६	६५	२३०
२९	जालना	१६	६५	४५३
	एकूण	८९३	२८६९	१५९३१