अभिनेता सैफ अली खान व अभिनेत्री अमृता सिंग यांची मुलगी सारा अली खानचे आतापर्यंत दोन चित्रपट प्रदर्शित झाले आहेत. या चित्रपटातून तिने प्रेक्षकांकडून कौतूकाची थाप मिळवली आहे. त्यात आता तिची आजी शर्मिली टागोर यांनी देखील तिचे कौतूक केले आहे. त्या आपल्या नातीची विनम्रता, खरेपणा व कामाप्रती निष्ठा पाहून खूप खूश आहेत.
मुंबईमध्ये आयोजित करण्यात आलेल्या पुरस्कार सोहळ्यात ज्येष्ठ अभिनेत्री शर्मिला टागोर यांना जीवन गौरव पुरस्कार मिळाला. त्यावेळी प्रसारमाध्यमांशी संवाद साधताना त्यांनी नात सारा अली खानचा अभिमान वाटत असल्याचे सांगितले व तिच्या सिनेमांपेक्षा तिच्या मुलाखती जास्त भावत असल्याचे त्या म्हणाल्या.
सध्या सारा दिल्लीत कार्तिक आर्यनसोबत 'लव आज कल २'चे चित्रीकरण करत आहे. या चित्रपटाचे दिग्दर्शन इम्तियाज अली करत आहे. साराने २०१८ साली 'केदारनाथ' चित्रपटातून बॉलिवूडमध्ये पदार्पण केले. या चित्रपटात तिच्यासोबत अभिनेता सुशांत सिंग राजपूत मुख्य भूमिकेत होता. या चित्रपटाचे दिग्दर्शन अभिषेक कपूरने केले आहे. या चित्रपटाला संमिश्र प्रतिसाद मिळाला. त्यानंतर त्याच वर्षी तिचा दुसरा चित्रपट सिम्बा प्रदर्शित झाला. यात तिच्यासोबत रणवीर सिंग मुख्य भूमिकेत होता. या चित्रपटाचे दिग्दर्शन रोहित शेट्टीने केले होते. या चित्रपटाने बॉक्स ऑफिसवर खूप चांगली कमाई केली होती.