ड्रामा क्वीन राखी सावंत तिच्या लग्नाच्या बातम्यांमुळे चर्चेत आहे. राखीने मुंबईच्या पंचतारांकित हॉटेलात एका एनआरआयशी गुपचूप लग्न केले, अशी बातमी कालपरवा आली आणि सगळ्यांनाच आश्चर्याचा धक्का बसला. पण या बातमीनंतर काही तासांतच माझ्या लग्नाची बातमी खोटी आहे. मी त्या हॉटेलात ब्राईडल फोटोशूटसाठी गेले होते, असे सांगून राखीने नेहमीप्रमाणे ‘ड्रामा’ केला. पण लपवून लपवून किती लपवणार? शेवटी राखीने स्वत:च लग्न केल्याची कबुली दिली. मी लग्न केले, अशी कबुली तिने दिली.
‘होय, मी लग्न केले आहे. पण आधी मी हे मान्य केले नाही. कारण मी घाबरले होते. मात्र आता मी लग्न केल्याची बातमी स्वत: तुमच्याशी शेअर करतेय. माझा पती एनआरआय आहे. त्याचे नाव रितेश आहे आणि तो युकेचा आहे. लग्नानंतर तो लगेच परत गेला. माझ्या व्हिसाची प्रक्रिया सुरू आहे. ती पूर्ण झाली की, मी त्याच्याजवळ जाईल,’ असे राखीने स्पॉटबॉयला दिलेल्या मुलाखतीत सांगितले. इतका चांगला नवरा मिळाल्याबदद्ल तिने परमेश्वराचे आभारही मानलेत.