बॉलिवूड अभिनेता सोनू सूदने नुकतीच दिल्लीचे मुख्यमंत्री अरविंद केजरीवाल यांची भेट घेतली. या भेटीनंतर आता सोनू सूद अभिनय सोडून राजकारणात प्रवेश करणार का, असा प्रश्न उपस्थित होतो आहे. या भेटीनंतर केजरीवाल यांनी एक पत्रकार परिषद घेतली. यावेळी मेंटर कार्यक्रमाचा ब्रँड ऍम्बेसेडर म्हणून सोनू सूदची निवड करण्यात आली. 'सोनू सूद सर्वांच्या मदतीसाठी प्रयत्न करत असतो देशासाठी तो एक प्रेरणास्थानी आहे', असे अरविंद केजरीवाल यांनी यावेळी म्हटले.
पत्रकार परिषदेत जेव्हा मुख्यमंत्री अरविंद केजरीवाल यांना विचारण्यात आले की सोनू सूदसोबत राजकीय चर्चादेखील झाली का?, त्यावर केजरीवाल म्हणाले की, नाही-नाही आमच्यात कोणतीच राजकीय चर्चा झाली नाही. तर सोनू सूद म्हणाला की, काहीच राजकीय नाही. मुलांच्या भविष्याचा प्रश्न हा राजकारणापेक्षा मोठा प्रश्न आहे. मला बऱ्याच काळापासून राजकारणाशी जोडण्याची संधी मिळत आली आहे, पण मी इंटरेस्टेड नाही. माझा असा कोणताच विचार नाही. ज्याचे विचार चांगले आहेत त्यांना दिशा नक्कीच मिळते.