'एबीसीडी' आणि 'एबीसीडी २' चित्रपटाच्या यशानंतर या चित्रपटाचा तिसरा भाग लवकरच प्रेक्षकांच्या भेटीला येणार आहे. काही दिवसांपूर्वीच याबद्दलची घोषणा केली गेली. यासोबतच या चित्रपटात अपारशक्ती खुराणादेखील झळकणार असल्याची माहिती फोटो शेअर करत दिली गेली. आता चित्रपटातील श्रद्धाच्या भूमिकेबद्दलही माहिती समोर आली आहे.
'एबीसीडी ३' या चित्रपटाचे दिग्दर्शन रेमो डिसूझा करणार आहेत. चित्रपटात श्रद्धा आणि वरूणमध्ये कोणताही रोमँटिक अँगल दाखवणार नसून चित्रपट केवळ डान्सवर आधारित असणार असल्याचे रेमोने म्हटले होते. अशात चित्रपटात श्रद्धाची भूमिका काय असणार याबाबत प्रेक्षकांमध्ये उत्सुकता होती. सूत्रांच्या माहितीनुसार या चित्रपटात श्रद्धा कपूर एका पाकिस्तानी डान्सरच्या भूमिकेत दिसणार आहे. यासाठी ती सध्या डान्सचे धडेदेखील घेत आहे. चित्रपटाच्या चित्रीकरणाला सध्या अमृतसरमध्ये सुरूवात झाली असल्याचे म्हटले जात आहे.
‘एबीसीडी ३’ मध्ये वरुणसोबतच श्रद्धाचीदेखील महत्वाची भूमिका असल्यामुळे ती सध्या प्रचंड मेहनत घेत आहे. प्रशांत शिंदे आणि तानिया यांच्याकडून श्रद्धा नृत्याचे धडे गिरवत आहे. प्रशांत आणि तानियाकडून श्रद्धा वेगवेगळे ५ नृत्यप्रकार शिकत आहे. यामध्ये Afro, Krump, Locking या डान्सप्रकारांचा समावेश आहे. श्रद्धाला पाकिस्तानी डान्सरच्या भूमिकेत पाहणे कमालीचे ठरणार आहे.