बॉलिवूडची बार्बी गर्ल म्हणजेच अभिनेत्री कतरिना कैफने कमी कालावधीत बॉलिवूडमध्ये आपले स्थान निर्माण केले. फक्त अभिनय कौशल्यानेच नाही तर तिने आपल्या नृत्याने चाहत्यांना भुरळ पाडली आहे. आता म्हणे ती दाक्षिणात्य चित्रपटात काम करणार असल्याचे सूत्रांकडून समजते आहे. इतकेच नाही तर ती दाक्षिणात्य चित्रपटसृष्टीतील लोकप्रिय अभिनेत्यासोबत रुपेरी पडद्यावर झळकणार असल्याचेही बोलले जात आहे.
कतरिना सध्या सलमानच्या बहुचर्चित 'भारत' चित्रपटामध्ये व्यग्र असून या चित्रपटानंतर ती चित्रपट दिग्दर्शक सुकुमार यांच्या आगामी चित्रपटात झळकणार आहे. या चित्रपटामध्ये तिच्यासोबत दाक्षिणात्य सुपरस्टार महेश बाबू मुख्य भूमिकेत दिसणार आहे. हे दोघे पहिल्यांदाच एकत्र स्क्रीन शेअर करताना दिसणार आहेत.
जर कतरिनाने हा चित्रपट साईन केला तर १० वर्षांमध्ये तिचा हा तिसरा तेलुगू चित्रपट ठरणार आहे. यापूर्वी कतरिनाने व्यंकटेश दुग्गुबती यांच्या 'मल्लिकाश्वरी' आणि नंदमूरी बालकृष्ण यांच्या 'अलारी पिडुगु' या चित्रपटामध्ये काम केले आहे. मात्र रुपेरी पडद्यावर कतरिना व महेश बाबू यांना एकत्र काम करताना पाहणे कमालीचे ठरणार आहे.