अक्षय कुमारने बॉलिवूडमध्ये 30 वर्षे पूर्ण केलीत. 25 जानेवारी 1991 रोजी अक्षयने ‘सौगंध’ या सिनेमाद्वारे बॉलिवूडमध्ये डेब्यू केला होता. अर्थात अक्षयचा हा पहिला सिनेमा दणकून आपटला. पण याऊपर अक्षयने बॉलिवूडमध्ये स्वत:ची एक वेगळी ओळख निर्माण केली. आज अक्की बॉलिवूडचा सर्वात बिझी स्टार आहे.
एक गोष्ट कदाचित तुम्हाला माहित नसावी, अजय देवगणचा ब्लॉकबस्टर ‘फुल और कांटे’ हा सिनेमा सर्वप्रथम अक्षयला ऑफर झाला होता. मात्र एक फोन कॉल आला आणि हा सिनेमा अक्षयने गमावला. होय, अक्षयला ऐनवेळी या सिनेमात रिप्लेस करण्यात आले होते.
अक्षयने स्वत: एका मुलाखतीत हा खुलासा केला होता. त्याने सांगितले होते की, ‘फुल और कांटे हा सिनेमा मला मिळाला होता. या सिनेमाच्या सॉन्ग मेकिंग, फोटोशूटला मी हजर होतो. एकदिवस मी नदीम-श्रवणसोबत माझे म्युझिक सेशन सुरू होते. मी फूल और कांटेच्या शूटींगची तयारी सुरु केली होती. याचदरम्यान एक कॉल आला आणि उद्या सकाळी शूटींगला येऊ नकोस, असे मला सांगण्यात आले. ’अक्षयला बाहेरचा रस्ता दाखवून अजय देवगणला या सिनेमात घेण्यात आले. हा सिनेमा अक्षयला मिळाला असता तर तो त्याचा डेब्यू सिनेमा ठरला असता. यानंतर अक्षयने ‘सौगंध’मधून डेब्यू केला. पण तो दणकून आपटला.