तेल उत्पादक देश इराणमध्येच राशनसारखं मिळतंय पेट्रोल! सरकारकडून नागरिकांना आवाहन

Iran Fuel Crisis : तेल सुविधांवरील हल्ल्यांमुळे इराणमधील ऊर्जा पुरवठ्यावर दबाव वाढला आहे, ज्यामुळे प्रशासनाला तात्पुरते नियंत्रण उपाय लागू करावे लागले आहेत, असे तज्ज्ञांचे मत आहे.

Iran Fuel Crisis : पश्चिम आशियातील युद्धाची झळ आता सामान्य नागरिकांच्या जीवनापर्यंत पोहोचली आहे. इराणची राजधानी तेहरानमधील महत्त्वाच्या तेल साठवणूक केंद्रांवर आणि ऊर्जा पायाभूत सुविधांवर झालेल्या हल्ल्यांनंतर प्रशासनाने इंधनाचा वापर नियंत्रित करण्यासाठी मोठा निर्णय घेतला आहे. तेहरान प्रांताच्या गव्हर्नरने नागरिकांसाठीच्या दैनंदिन पेट्रोल कोट्यात मोठी कपात करण्याची घोषणा केली आहे.

३० लिटरऐवजी आता मिळणार फक्त २० लिटर पेट्रोल'फार्स न्यूज एजन्सी'ने दिलेल्या वृत्तानुसार, वैयक्तिक इंधन कार्डद्वारे मिळणारा पेट्रोलचा कोटा आता दररोज ३० लिटरवरून घटावून २० लिटर करण्यात आला आहे. तेल साठ्यांवर झालेल्या हल्ल्यांमुळे पुरवठा साखळी विस्कळीत झाली असून, उपलब्ध साठा संतुलित राखण्यासाठी प्रशासनाला हे पाऊल उचलावे लागले आहे.

'घाबरू नका, ही तात्पुरती व्यवस्था'; प्रशासनाचे आवाहनतेहरानच्या गव्हर्नरने नागरिकांना शांत राहण्याचे आवाहन केले आहे. इंधन पुरवठ्यात आलेला हा अडथळा लवकरच दूर केला जाईल, असा विश्वास त्यांनी व्यक्त केला. "ही व्यवस्था तात्पुरती असून परिस्थिती सामान्य होताच इंधन कोटा पुन्हा जुन्या स्तरावर (३० लिटर) आणला जाईल," असेही प्रशासनाकडून स्पष्ट करण्यात आले आहे.

वाचा - युद्धाच्या भीतीने परदेशी गुंतवणूकदारांचा भारतीय बाजारातून काढता पाय; सेन्सेक्स-निफ्टीवर विक्रीचा दबाव

महत्त्वाचे मुद्दे

• ऊर्जा केंद्रांवर झालेल्या हल्ल्यांमुळे इराणच्या अंतर्गत इंधन पुरवठ्यावर प्रचंड ताण आला आहे.
• दोन-तीन दिवसांचा अवधी: परिस्थिती पूर्वपदावर येण्यासाठी किमान दोन ते तीन दिवसांचा वेळ लागण्याची शक्यता आहे.
• युद्धाच्या परिस्थितीत तेल सुविधेवर झालेले हल्ले इराणच्या अर्थव्यवस्थेसाठी मोठे आव्हान ठरू शकतात.