Wheat Market Price: रब्बी हंगामाच्या पार्श्वभूमीवर गव्हाच्या बाजारात यंदा वेगळे चित्र पाहायला मिळत आहे. दरवर्षी हंगामात दर घसरत असताना, यंदा मात्र गव्हाच्या दरात क्विंटलमागे सुमारे २०० रुपयांची वाढ झाली आहे.
त्यामुळे पुढील काळात दर आणखी वाढतील या अपेक्षेने शेतकरी साठवणुकीकडे वळत असल्याचे दिसून येत आहे.(Gahu Bajarbhav)
सध्या गव्हाचे दर साधारण २,२०० रुपयांच्या आसपास होते. मात्र नवीन गहूबाजारात येऊ लागल्यानंतर दरात वाढ होऊन शेतकऱ्यांना काहीसा दिलासा मिळाला आहे.(Gahu Bajarbhav)
यंदा बदलत्या हवामानाचा गव्हाच्या उत्पादनावर मोठा परिणाम झाला. थंडीचा कडाका कमी राहिल्याने दाण्यांची गुणवत्ता आणि वजन कमी झाल्याचे दिसून आले. त्यामुळे अपेक्षित उत्पादन झाले नाही आणि बाजारात आवकही मर्यादित राहिली.(Gahu Bajarbhav)
विशेष म्हणजे, पहिल्या टप्प्यात पेरणी केलेल्या गव्हाची गुणवत्ता तुलनेने चांगली असल्याचे व्यापाऱ्यांचे म्हणणे आहे. अनेक भागांत एकरी उत्पादन घटल्याने बाजारात पुरवठा कमी आहे, तर दुसरीकडे सण-उत्सव आणि लग्नसराईमुळे मागणी सातत्याने वाढत आहे.(Gahu Bajarbhav)
आंतरराष्ट्रीय स्तरावर सुरू असलेल्या संघर्षामुळे अन्नधान्य पुरवठ्यावर परिणाम होत असून, त्याचाही स्थानिक दरांवर प्रभाव पडत आहे.
डाळवर्गीय पिकांनाही आधार
गव्हासोबतच तूर आणि हरभरा या डाळवर्गीय पिकांच्या दरातही सुधारणा दिसून येत आहे. तुरीचा दर सध्या हमीभावापेक्षा सुमारे २०० रुपयांनी अधिक आहे.
हरभऱ्याची नाफेडमार्फत खरेदी सुरू असतानाच खुल्या बाजारातही चांगला उठाव आहे. उत्पादनातील घट आणि सणासुदीतील वाढती मागणी यामुळे दराला आधार मिळत असल्याचे व्यापाऱ्यांचे मत आहे.
सोयाबीनच्या दरातही वाढ
सोयाबीन उत्पादक शेतकऱ्यांसाठीही काहीसा दिलासा मिळत आहे. गेल्या काही महिन्यांपासून ४,४०० ते ४, ५०० रुपयांवर स्थिरावलेले दर आता ४,८०० ते ५,३०० रुपये क्विंटलपर्यंत पोहोचले आहेत. खाद्यतेलाच्या आयातीवरील शुल्कातील बदल आणि आंतरराष्ट्रीय बाजारातील हालचालींमुळे ही वाढ झाली आहे.
एकूणच, यंदा हंगामात गहूसह प्रमुख पिकांच्या दरात अंशतः सुधारणा झाली असली, तरी बाजारातील मर्यादित आवक, हवामानाचा परिणाम आणि जागतिक घडामोडी यामुळे पुढील काळात दराचा कल कसा राहील, याकडे शेतकऱ्यांचे लक्ष लागले आहे.
अधिक वाचा : Harbhara Market :हरभऱ्याची आवक वाढली; एप्रिलमध्ये भाव किती मिळणार?