धाराशिव : अतिवृष्टी, कमी उत्पादन आणि खासगी बाजारातील पडत्या दरांमुळे आर्थिक संकटात सापडलेल्या सोयाबीन उत्पादक शेतकऱ्यांसाठी दिलासादायक बातमी समोर आली आहे. (Soybean Kharedi)
फेडरेशननंतर आता कृषी पणन मंडळानेही सोयाबीनची हमीभावाने खरेदी करण्यास हिरवा कंदिल दिला आहे. जिल्ह्यात एकूण ८४ खरेदी केंद्रे सुरू होण्याची शक्यता असून, यामुळे शेतकऱ्यांना बाजारपेठेतील दरकपातीपासून मोठा दिलासा मिळणार आहे.(Soybean Kharedi)
शेतकऱ्यांसाठी मोठा दिलासा
या वर्षी अतिवृष्टीमुळे सोयाबीनचे उत्पादन लक्षणीय प्रमाणात घटले. कमी उत्पादन असूनही खासगी व्यापाऱ्यांकडून भाव पाडले जात असल्याने शेतकरी त्रस्त होते. १५ नोव्हेंबरपासून फेडरेशनमार्फत २१ केंद्रांवर खरेदी सुरू असली तरी खरेदी प्रक्रियेतील संथगतीमुळे तक्रारी वाढल्या आहेत.
हीच परिस्थिती लक्षात घेऊन, कृषी पणन मंडळाने पुढाकार घेत हमीभावाने सोयाबीन खरेदीचे ८४ केंद्रे उघडण्याचा निर्णय घेतला. विभागीय व्यवस्थापक महादेव बरडे यांनी धाराशिव जिल्ह्यातील ४९ केंद्रांना प्राथमिक मंजुरी दिली आहे.
शेतकऱ्यांना होणारे फायदे
हमीभाव मिळणार - बाजारातील दरापेक्षा अधिक आणि स्थिर भाव
खासगी व्यापाऱ्यांकडून लूट थांबणार
खरेदी केंद्रे वाढल्याने गर्दी व प्रतीक्षेत घट
फार्मर प्रोड्यूसर कंपनी (FPC), बाजार समिती आणि सहकारी संस्थांमार्फत खरेदी
वाहतूक खर्चात बचत, कारण खरेदी केंद्रे गावागावात उपलब्ध
धाराशिव जिल्ह्यात केंद्रांना मंजुरी
२२ फार्मर प्रोड्यूसर कंपनी (FPC)
४ बाजार समित्या
२३ सहकारी संस्था
यांना खरेदीसाठी मंजुरी मिळाली आहे.
याशिवाय ३५ संस्था व कंपन्यांना अलर्ट जारी करण्यात आला असून, त्यांनाही खरेदी प्रक्रियेत सामील करण्याची तयारी आहे.
ऑनलाइन नोंदणी आवश्यक
फेडरेशनप्रमाणेच पणन मंडळाच्या केंद्रांवरही शेतकऱ्यांना सोयाबीन विक्रीसाठी ऑनलाइन नोंदणी बंधनकारक आहे. नोंदणी झालेल्यांनाच खरेदीसाठी प्राधान्य दिले जाणार आहे.
अधिकारी काय म्हणतात?
सोयाबीन उत्पादक शेतकऱ्यांची कोणतीही गैरसोय होऊ नये आणि त्यांना चांगला भाव मिळावा. यासाठी कृषी पणन मंडळाने खरेदी सुरू करण्याचा निर्णय घेतला आहे. जिल्ह्यात ४९ पेक्षा जास्त संस्था मंजूर केल्या असून काहींना अलर्ट पाठवण्यात आला आहे. - पांडुरंग साठे, जिल्हा उपनिबंधक, सहकार विभाग, धाराशिव
खरेदी प्रक्रियेला गती मिळणार
फेडरेशनसोबत पणन मंडळही खरेदी करणार आहे.
खरेदीसाठी लागणारा वेळ कमी होईल
मोठ्या प्रमाणात रांग आणि गर्दी टळेल
शेतकऱ्यांना त्यांच्या मालाचे वेळीच मोजमाप होईल
यामुळे शेतकऱ्यांचे अनेक दिवस केंद्रावर थांबण्याचे कष्ट कमी होणार आहेत.