Crop Insurance : अकोला जिल्ह्यातील मूग, उडीद, ज्वारी पिकांचे कापणी प्रयोग पूर्ण झाले असून, सोयाबीन आणि कपाशी, तूर यांचे प्रयोग लवकरच सुरू होणार आहेत. यंदा हवामानाच्या प्रतिकूलतेमुळे शेतकऱ्यांचे उत्पन्न प्रभावित झालेले असून, पीक विमा लाभासाठी सर्व शेतकरी उत्सुक आहेत.(Crop Insurance)
यंदाच्या खरीप हंगामात पीक विमा योजना अंतर्गत शेतकऱ्यांना लाभ मिळवण्यासाठी जिल्ह्यात सोयाबीन पीक कापणीचे प्रयोग सुरू करण्यात आले आहेत. यंदापासून पीक विम्याचा लाभ कापणी प्रयोगातील उत्पन्नाच्या आधारावर ठरविण्यात येणार आहे, जे शेतकऱ्यांसाठी एक महत्वाचा टप्पा ठरणार आहे.(Crop Insurance)
पीक विमा योजनेचा विस्तार
अकोला, अकोट, बाळापूर, बार्शिटाकळी, मुर्तिजापूर, पातुर आणि तेल्हारा या सातही तालुक्यात १ लाख १५ हजार १३७ शेतकऱ्यांनी सोयाबीन, कापूस, तूर, मूग व उडीद यांसारख्या खरीप पिकांचा विमा घेतला आहे.
यंदा पीक विमा लाभ ठरवताना गेल्या सात वर्षांच्या सरासरी उत्पन्नाशी तुलना करून कमी उत्पन्न असलेले शेतकरी लाभासाठी पात्र ठरणार आहेत.
कापणी प्रयोगाची पारदर्शक पद्धत
जिल्ह्यातील ५२ महसूल मंडळांमध्ये महसूल, कृषी व ग्रामविकास विभागाच्या समन्वयाने पीक कापणीचे प्रयोग सुरू आहेत.
मूग, उडीद व ज्वारी या पिकांचे प्रयोग पूर्ण झाले आहेत.
सोयाबीन कापणीचे प्रयोग गेल्या आठवड्यापासून सुरू असून, कपाशी व तूर या पिकांचे प्रयोग लवकरच होणार आहेत.
प्रत्येक महसूल मंडळात १२ प्रयोग घेऊन पिकांचे उत्पन्न नोंदवले जात आहे.
अतिवृष्टी व पूराचा प्रभाव
यंदाच्या पावसाळ्यात जिल्ह्यात अतिवृष्टी आणि पूरामुळे खरीप पिकांचे मोठ्या प्रमाणात नुकसान झाले आहे. परिणामी, पीक कापणी प्रयोगाच्या आधारावर शेतकऱ्यांना किती पीक विम्याचा लाभ मिळणार, हे प्रयोग पूर्ण झाल्यानंतर स्पष्ट होणार आहे.
संपूर्ण प्रक्रियेत पारदर्शकता ठेवून प्रत्येक महसूल मंडळातील पीक कापणीचे प्रयोग पूर्ण केले जात आहेत. सोयाबीनसह कपाशी व तूर या पिकांचे प्रयोग लवकरच सुरू होतील. यावरून पीक विम्याचा लाभ योग्य शेतकऱ्यांपर्यंत पोहोचेल. - विलास वाशीमकर, तालुका कृषी अधिकारी, अकोला
पीक विमा योजना आणि कापणी प्रयोग यांमुळे शेतकऱ्यांना नुकसान भरपाईचा एक ठोस मार्ग मिळणार आहे. मात्र, यंदाच्या हंगामातील हवामानातील अडचणींमुळे शेतकरी सध्या काहीशी चिंता व्यक्त करत आहेत. जिल्ह्यातील शेतकरी आणि कृषी अधिकारी दोघेही उत्सुकतेने कापणी प्रयोगाच्या निकालाची प्रतीक्षा करत आहेत.
हे ही वाचा सविस्तर : Crop Insurance : 'या' जिल्ह्यात १ लाखाहून अधिक शेतकरी विमा कवचाखाली