Dairy Farming Success Story : गोपालनात मोठी कमाई कशी? 'या' अभियंत्याने दिला जिंकण्याचा मंत्र वाचा सविस्तर

Dairy Farming Success Story : अवघ्या एका गाईपासून सुरुवात करून अवघ्या दहा वर्षांत १०० गीर गाईंची अत्याधुनिक गोशाळा उभी करणाऱ्या एका अभियंत्याची ही प्रेरणादायी कहाणी आहे. आधुनिक तंत्रज्ञान, ब्राझीलच्या बीडिंग पद्धतीचा वापर, शिस्तबद्ध व्यवस्थापन आणि थेट दुग्धविक्रीमुळे हा गोपालन व्यवसाय फायदेशीर ठरत आहे. रोजचा मोठा खर्च असूनही नफा कसा मिळतोय? जाणून घ्या या यशस्वी गीर गोशाळेचा संपूर्ण फॉर्म्युला… (Dairy Farming Success Story)

श्याम पुंगळे/गणेश पंडीत

राजूर/केदारखेडा परिसरात एका अभियंत्याने उभा केलेला गोपालनाचा आदर्श आज राज्यभर चर्चेचा विषय ठरत आहे.(Dairy Farming Success Story)

मूळ टाकळी पालोदे येथील आणि सध्या राजूर येथे स्थायिक असलेले मारोती नामदेव पालोदे यांनी अवघ्या एका गाईपासून सुरू केलेला प्रवास आज १०० गीर गाईंपर्यंत पोहोचवला आहे.(Dairy Farming Success Story) 

जिद्द, चिकाटी, आधुनिक तंत्रज्ञान आणि शिस्तबद्ध व्यवस्थापनाच्या जोरावर त्यांनी गोपालनाला खऱ्या अर्थाने उद्योगाचे रूप दिले आहे.(Dairy Farming Success Story)

अभियंता ते यशस्वी गोपालक

सन २००६ मध्ये अभियंता पदवी पूर्ण केल्यानंतर स्वतःचा व्यवसाय सुरू करतानाच शेतीपूरक उद्योगाची वाट त्यांनी निवडली. 'अभियंता झालो, पण मातीशी नाळ तुटू दिली नाही,' असे ते अभिमानाने सांगतात.

सुरुवातीला मर्यादित साधने, आर्थिक अडचणी आणि अनुभवाचा अभाव या सर्वांवर मात करत त्यांनी नियोजनबद्ध पद्धतीने गोशाळेचा विस्तार केला.

आज त्यांच्या गोशाळेत तब्बल १०० गीर जातीच्या गाई तंदुरुस्त वाढत आहेत.

अत्याधुनिक गोठा

एका एकर जागेत उभारलेला त्यांचा गोठा अत्याधुनिक सुविधांनी सुसज्ज आहे.

गाईंसाठी मुक्त संचार व्यवस्था

योग्य वायुविजन आणि स्वच्छता

स्वयंचलित पाणीपुरवठा

स्वतंत्र खाद्य नियोजन

दररोज सुमारे २० हजार रुपयांचा चारा-पाण्याचा खर्च होतो. मात्र त्यासाठी त्यांनी स्वतः चा मुरघास (सिलेज) निर्मिती प्रकल्प उभारला आहे, ज्यामुळे खर्चावर नियंत्रण आणि गुणवत्तेत सातत्य राखले जाते.

ब्राझीलच्या तंत्रज्ञानाचा वापर

गाईंच्या वंशवृद्धीसाठी त्यांनी ब्राझील (Brazil)  येथील अत्याधुनिक बीडिंग (Breeding) तंत्रज्ञान स्वीकारले आहे. यासाठी त्यांना सुखानंद पारवे यांचे मार्गदर्शन लाभले. दर्जेदार वंशवृद्धी आणि अधिक उत्पादनक्षम गायी निर्माण करणे हा त्यांचा मुख्य उद्देश आहे.

पशुमहोत्सवातील यश

पालोदे यांनी आपल्या गायी विविध पशुमहोत्सवांत सादर करून गुणवत्तेची छाप उमटवली आहे.

२०१९ – जालना : द्वितीय क्रमांक

२०२३ – शिर्डी : प्रथम क्रमांक

अलीकडे – बीड : तृतीय क्रमांक

सलग पुरस्कारांनी त्यांच्या गोशाळेची गुणवत्ता अधोरेखित केली आहे.

दुग्धजन्य उत्पादनातून थेट विक्री

गोशाळेतून मिळणाऱ्या दुधापासून तूप, दही, पनीर, पेढे यांसारखे दुग्धजन्य पदार्थ तयार करून थेट ग्राहकांना विक्री केली जाते.

* ग्राहकांना शुद्ध उत्पादने मिळतात

* स्थानिक पातळीवर रोजगारनिर्मिती होते

* नफा थेट उत्पादकाकडे राहतो

* तरुणांसाठी प्रेरणादायी संदेश

आधुनिक तंत्रज्ञान, शिस्तबद्ध व्यवस्थापन आणि दर्जेदार वंशवृद्धी यावर भर दिल्यास गोपालन हा फायदेशीर उद्योग ठरू शकतो. तरुणांनी शेती व पशुपालनाकडे उद्योग म्हणून पाहावे.- मारोती नामदेव पालोदे, शेतकरी

प्रेरणादायी यशोगाथा

एका गाईपासून शंभर गाईंपर्यंतचा हा प्रवास केवळ संख्येचा नाही, तर आत्मविश्वास, नियोजन आणि आधुनिकतेचा आहे. पालोदे यांची गोशाळा आज परिसरातील तरुणांसाठी नवी दिशा दाखवत आहे.

गोपालनातही आधुनिक तंत्रज्ञान, योग्य व्यवस्थापन आणि गुणवत्तेचा आग्रह असेल, तर यशाची शंभरी गाठणे अशक्य नाही हे त्यांनी कृतीतून सिद्ध करून दाखवले आहे.

हे ही वाचा सविस्तर : Farmer Success Story : आधुनिक शेतीचा फॉर्म्युला हिट; जालन्यातील शेतकऱ्याने मोडला उत्पादनाचा विक्रम

अधिक वाचा : Farmer Success Story : अबब! हळदीने गावाला दिले ५ कोटींचे ‘सोन्याचे’ उत्पन्न वाचा सविस्तर यशकथा