ठळक मुद्देमहागाईचा भडका उडू नये यासाठीच आरबीआयने रेपो दरात कोणताही बदल केलेला नाही.

मुंबई - रिझर्व्ह बँक ऑफ इंडियाने बुधवारी दुपारी पतधोरण जाहीर करताना महत्वाच्या व्याजदरात कोणताही बदल केलेला नाही. अपेक्षेप्रमाणे आरबीआयने रेपो तसेच रिव्हर्स रेपो दरात कोणताही बदल केलेला नाही. रेपो आणि रिव्हर्स रेपो दर जैसे थे ठेवले आहेत. रेपो दर 6 टक्के तर, रिव्हर्स रेपो दर 5.75 टक्के कायम ठेवला. ऑगस्ट महिन्यात आरबीआयने रेपो दरात 25 पाँईटसनी कपात केली होती. 

आरबीआयने ऑगस्ट महिन्यात 2017-18 आर्थिक वर्षात विकास दर 7.3 टक्के राहील असे म्हटले होते. पण आता आरबीआयने त्यात बदल केला आहे. आर्थिक विकास दर 6.7 टक्के राहील असा नवा अंदाज वर्तवला आहे. जीएसटीचा विविध क्षेत्रातील आर्थिक विकासावर परिणाम झाला आहे. 

ऑगस्ट महिन्यात महागाईचा दर 3.36 टक्के होता. आगामी काळात महागाईचा दर 4.2 ते 4.6 टक्के राहील असा अंदाज आरबीआयचे गर्व्हनर ऊर्जित पटेल यांनी व्यक्त केला. महागाईचा भडका उडू नये यासाठीच आरबीआयने रेपो दरात कोणताही बदल केलेला नाही. रेपो रेट कमी झाल्यास बँकांकडून आपण जे कर्ज घेतो त्यावरील व्याजदर कमी होतो. व्याजदर कमी झाल्यास उलाढाल वाढते. ज्याचा गृहनिर्माण, वाहन उद्योग या क्षेत्रांना फायदा होतो. म्हणून रेपो दरावर उद्योग क्षेत्राप्रमाणे सर्वसामान्यांचेही लक्ष असते. 

काय असतो रेपो रेट ?
रेपो रेट म्हणजे ज्या दराने बँका रिझर्व बँकेकडून अल्पमुदतीची कर्जे घेते तो दर.  रेपो रेट वाढणं म्हणजे बँकांना रिझर्व बँकेकडून मिळणाऱ्या कर्जदरात वाढ होणं, तर रेपो रेट कमी होणं म्हणजे बँकेला स्वस्तात कर्ज मिळणं. म्हणजेच आरबीआयने रेपो रेट वाढवला तर पर्यायाने सर्व बँकांना ग्राहकांना द्यावयाची कर्जाचे दरही वाढवावे लागतात.  तर हा दर कमी झाल्याने व्याज दर कमी होतो.
 

रिव्हर्स रेपो रेट म्हणजे काय?
रिव्हर्स रेपो रेट म्हणजे रेपो रेटच्या अगदी उलट संकल्पना.. बँका त्यांच्याकडे असलेला जास्तीचा निधी ठेवींच्या रुपात रिझर्व बँककडे जमा करतात. या ठेवींवर रिझर्व्ह बँक बँकांना देत असलेल्या व्याजदराला रिव्हर्स रेपो रेट म्हणतात.


Get Latest Marathi News & Live Marathi News Headlines from Politics, Sports, Entertainment, Business and local news from all cities of Maharashtra.