आमना शरीफ... डेली सोप्समध्ये दिसणारा एक गोड, निरागस, सुंदर चेहरा. आमनाने नुकतेच काही दिवसांपूर्वी एक बोल्ड फोटो शूट केले होते. त्याची प्रचंड चर्चा सोशल मिडियावर झाली. नेहमी सोबर आणि इथनिक कपड्यांमधे दिसणारी आमना अचानक बोल्ड रूपात अवतरल्याने तिचे चाहतेही चांगलेच अचंबित झाले होते. आता मात्र पुन्हा एकदा आमना तिच्या हटके इथनिक स्टाईलमध्ये परत आली आहे. आमनाने नुकतेच बेबी पिंक किंवा हलक्या गुलाबी रंगाची साडी नेसून फोटोशूट केले आहे. तिचा हा इथनिक लूक सध्या सोशल मिडियावर चांगलाच गाजतो आहे.
आमनाने जी साडी नेसली आहे, ती अशा प्रकारची आहे जी तुम्ही ऑफिसला जातानाही नेसू शकता, एखाद्या पार्टीमध्येही नेसू शकता किंवा आता नवरात्रीमध्ये इथनिक लूक कॅरी करायचा असेल, तर तेव्हाही ती हमखास भाव खाऊन जाऊ शकते. अशी प्रत्येक ठिकाणी हटके लूक देणारी ही साडी जबरदस्त ट्रेण्डी आहे.
आमनाने या साडीचे फोटो इन्स्टाग्रामवर शेेअर केले असून त्याला प्रचंड लाईक्स मिळत आहेत. “Yeh saariLai Bhaari,” अशी कॅप्शनही आमनाने या फोटोला दिली आहे. यामध्ये आमनाने तिचा मेकअप अतिशय सोबर ठेवला आहे. त्यामुळे साडीचे सौंदर्य अधिकच खूलून आले आहे. लाँग इअरिंग्स तिने घातले असून गळ्यात काहीही घातले नाही. या साडीवर तिने त्याच रंगाचे स्लिव्हलेस ब्लाऊज घातले असून एका हातात घड्याळ घातली आहे. साडीवर ज्या ॲक्सेसरीज तिने घातल्या आहेत, यावरून ती साडी फॉर्मल आणि इनफॉर्मल अशा दोन्ही ठिकाणी जबरदस्त कॅची ठरेल, हे लगेचच दिसून येते.
कशी आहे आमनाची साडी?आमनाने नेसलेली साडी मलमल ब्रॅण्डची असून ती पुर्णपणे कॉटनची आहे. हलक्या पिंग रंगाच्या साडीवर मोतीया रंगाच्या दोऱ्याने एम्ब्रॉयडरी करण्यात आली आहे. लहान- लहान फुलं आणि पानं यांचं केलेले थ्रेड वर्क लक्षवेधक आहे. साडीच्या काठांना हेरिटेज लेस बॉर्डर आहे. त्यामुळे साडीचा मुळ रंग अधिक खुलला आहे. आमनाने नेसलेली ही साडी तब्बल १४ हजारांची आहे. अशा लाईट कलर शेडची सध्या जबरदस्त फॅशन आहे. त्यामुळे नवरात्रीला एम्ब्राॅयडरीची साडी आणि ट्रेण्डी एक्सेसरीज असा विचार करायला काहीच हरकत नाही.