Gardening Tips: उन्हाळ्यात कुंडीतला पुदिना सुकतो? 'या' टिप्समुळे कायम राहील हिरवागार आणि टवटवीत!

Gardening Tips: कोथिंबिरीइतका पुदिन्याचा वापर दैनंदिन आहारात होत नसला, तरी चटणी, सॅलड, ताक, मट्ठा करताना पुदिन्याचा वापर होतो. पाणीपुरीचे पाणी तर पुदिन्याशिवाय अपूर्णच! उन्हाळ्यात लिंबू सरबतात पुदिन्याची पाने चव वाढवतात आणि आरोग्यदायी ठरतात. याच काळात पुदिन्याचा भाव वधारतो. मात्र पूर्ण जुडी विकत घेऊनही ती वापरली जाईलच असे नाही. हिरवीगार पाने कालांतराने काळवंडली की वाईट वाटते तो भाग वेगळा. यावर उपाय म्हणून घरच्या कुंडीत पुदिना लावा आणि हवा तेव्हा, हवा तेवढा पुदिन्याचा वापर करा.

पुदिना लावण्यासाठी जर तुम्ही या सोप्या टिप्सचे पालन केले तर तुमचे पुदिन्याचे रोप उन्हाळ्यातही हिरवे राहील आणि तुम्ही संपूर्ण हंगामात पुदिन्याच्या ताज्या चटणीचा आस्वाद घेऊ शकाल. योग्य काळजी घेतल्यास, ही वनस्पती केवळ तुमच्या स्वयंपाकघरासाठीच नाही तर तुमच्या आरोग्यासाठीही फायदेशीर ठरेल.

या उन्हाळ्यात तुम्हालाही घरामध्ये पुदिना वापरायचा असेल, तर घरी रोप लावण्याची ही खास वेळ आहे. एप्रिल पासून जर पुदिन्याची चांगली लागवड केली आणि योग्य काळजी घेतली, तर संपूर्ण उन्हाळ्यात तुम्ही घरची पुदिन्याची चटणी खाता येईल! कारण पुदिन्याची योग्य काळजी घेतली नाही तर ते लवकर सुकायला लागते. येथे काही सोप्या टिप्स आहेत, ज्याचा अवलंब करून तुम्ही तुमच्या पुदिन्याचे रोप हिरवे ठेवू शकता.

योग्य माती :

पुदिन्याचे रोप लावण्यासाठी माती स्वच्छ करून गाळून घ्या. कुंडीत पुदिना लावतात मातीमध्ये खत आणि वाळू मिसळू शकता, जेणेकरून माती मऊ आणि सुपीक राहते. पुदिना आणल्यावर काही काड्यांची पाने अर्धवट खुडून त्या काड्या तीन दिवस पाण्याच्या भांड्यात ठेवा, त्याला मूळ धरली की ती मातीत रुजवा.

नियमितपणे पाणी द्या :

पुदिन्याला उन्हाळ्यात जास्त पाणी लागते. दिवसातून किमान दोनदा (सकाळ आणि संध्याकाळ) पाणी द्या, जेणेकरून माती नेहमी ओलसर राहील. परंतु लक्षात ठेवा की जास्त पाणी नसावे, कारण यामुळे मुळे कमकुवत होतात.

थेट सूर्यप्रकाश नको :

पुदिन्याचे रोप हलक्या सूर्यप्रकाशात आणि सावलीच्या ठिकाणी चांगले वाढते. खूप तीव्र सूर्यप्रकाश असल्यास झाड कोमेजते. अशा झाडाला सावलीच्या जागी ठेवा किंवा हलक्या कापडाने झाकून ठेवा, जेणेकरून पाने कोमेजणार नाहीत.

वेळोवेळी कापणी :

पुदिन्याच्या रोपांची योग्य रीतीने वाढ होण्यासाठी वेळोवेळी त्याची कापणी करणे महत्वाचे आहे. जेव्हा पाने खूप वाढतात तेव्हा वरून हलकी छाटणी करा. त्यामुळे झाडाची वाढ झपाट्याने होईल आणि नवीन पाने येतील.

सेंद्रिय खतांचा वापर करा:

दर १०-१५ दिवसांनी सेंद्रिय खते जसे की शेणखत, कोकोपीट किंवा पानांचे खत घाला. यामुळे झाड हिरवे राहते आणि रोपाची गुणवत्ता सुधारते. झाड हिरवेगार राहते.

कीड लागण्यापासून संरक्षण:

उन्हाळ्यात पुदिन्याच्या झाडावर किडीचा धोका वाढतो. यासाठी तुम्ही कडुलिंबाचे तेल किंवा सौम्य साबण मिसळलेले पाणी शिंपडू शकता, जेणेकरून पाने सुरक्षित राहतील आणि वनस्पती निरोगी राहतील.

नवीन कलमांचा वापर करा :

जर तुम्हाला वाटत असेल की तुमची वनस्पती कमकुवत होत आहे, तर तुम्ही तिची फांदी कापून पाण्यात टाकू शकता. काही दिवसांत मुळे दिसू लागतील आणि तुम्ही ती नवीन कुंडीत लावू शकता. अशा प्रकारे तुमचे पुदिन्याचे रोप नेहमी वाढत राहील.