भुयारी मेट्रोमुळे सुपर कनेक्टिव्हिटी, शहर-उपनगर आणखी जवळ येणार

अत्रे चौक ते कफ परेडचा टप्पा ऑगस्टपर्यंत सुरू होणार?

लोकमत न्यूज नेटवर्क
मुंबई : मेट्रो विस्तार आणि स्मार्ट वाहतूक यंत्रणेला गती देण्यासाठी १९ महत्त्वाच्या कंत्राटांना २४ जूनला मंजुरी दिली असतानाच आता दुसरीकडे मुंबई मेट्रो रेल कॉर्पोरेशन लिमिटेडकडून भुयारी मेट्रो ३ ला देखील गती मिळत आहे. ही मेट्रो सध्या आरे-जेव्हीएलआरपासून अत्रे चौकापर्यंत धावत असून, अत्रे चौकापासून कफ परेडपर्यंतचा टप्पा ऑगस्टपर्यंत सुरू होणे अपेक्षित आहे. 

 या मार्गात मंत्रालयासह महत्त्वाची कार्यालये असून, लोकलसह उर्वरित प्रवासी साधनांनी धावपळ करत ही ठिकाणे गाठणाऱ्या प्रवाशांना भुयारी मेट्रो वरदान ठरणार आहे.   विमानतळासोबत घाटकोपर-अंधेरी-वर्सोवा या मेट्रो १ ला देखील मेट्रो ३ जोडली आहे. शिवाय मेट्रो २ ब देखील बीकेसीमध्ये मेट्रो ३ ने जोडण्यात येणार असून, मेट्रो ६ ला देखील आरे येथे मेट्रो ३ ची जोडणी दिली जाणार आहे.  

   दरम्यान, मुंबई शहर आणि उपनगरांतील मेट्रो प्रवाशांना सेवा देणार असतानाच ठाणे आणि नवी मुंबईमधील मेट्रो सेवाही मुंबईशी जोडण्याचे नियोजन झाले आहे. परिणामी २०३० पर्यंत मेट्रो महामुंबई सहजरित्या जोडली जाईल. 

स्थानिक परिवहन व्यवस्थेला चालना 
मुंबई महानगर मेट्रो लाइन-३ (एमएमएल-३) चे उद्दिष्ट म्हणजे मुंबईच्या अपुरी उपनगरी रेल्वे प्रणालीला पूरक, असा एक मोठ्या प्रमाणावर जलद वाहतूक प्रणाली पुरवणे, ज्यामुळे मेट्रो लोकांच्या दाराशी आणली जात आहे.
एमएमएल-३ च्या संपूर्ण कार्यान्वयनानंतर, शहरातील वाहतुकीच्या प्रमाणात लक्षणीय घट होईल आणि स्थानिक परिवहन व्यवस्थेला चालना मिळेल, असा दावा मुंबई मेट्रो रेल कॉर्पोरेशन लिमिटेडने केला आहे.

१२ हजार कोटी रुपयांपेक्षा अधिक कामे 
२४ जूनला रोजी मेट्रो प्रकल्पांसाठी एमएमआरडीएकडून १२ हजार कोटींपेक्षा अधिक रकमेच्या कामांना मंजुरी मिळाली आहे. 

दहिसर ते मीरा-भाईंदरचे काम वेगात सुरू 
एमएमआरडीएच्या ३३७.१० किलोमीटर लांबीच्या मेट्रो नेटवर्कचा एक महत्त्वाचा घटक असलेला मेट्रो मार्ग ९ हा दहिसर (पूर्व) ते मीरा-भाईंदरदरम्यान जोडणारा असून, सध्या या मार्गाचे काम वेगाने प्रगतिपथावर आहे.

ठाणे जिल्ह्यातील मोघरपाडा येथे  एकात्मिक मेट्रो कार डेपो उभारण्यात येणार आहे. हा डेपो मेट्रो ४, ४ अ, १०, ११ या मार्गिकांसाठी केंद्रीय संचालन व देखभाल केंद्र असेल. सीएसएमटी ते मीरा रोडदरम्यान ५५.९९ किमीच्या मेट्रो मार्गाचे संचालन येथून होईल.