“जिकडे बॉम्बे असेल तिकडे मुंबई करू, शाळेची नावेही बदलू”; उद्धव ठाकरेंनी व्यक्त केला निर्धार

Uddhav Thackeray News: मुंबईचे मराठीपण हे लोक हळूवारपणे मारत चालले आहेत, अशी टीका उद्धव ठाकरे यांनी केली.

Uddhav Thackeray News: मुंबईत प्रदूषण वाढले आहे. मुंबईची हवा घातक होत चालली आहे. राज्यकर्ते अकलेचे तारे तोडत आहेत. इथिओपियात ज्वालामुखीचा उद्रेक झाला त्यानंतर धुळीचे लोट उडाले, त्यामुळे प्रदूषण होत आहे, असे म्हणत आहेत. परंतु, हे लोट त्याचे नाहीत मागचे दोन ते चार वर्षे मुंबई महापालिकेत जो भ्रष्टाचार झाला, महाराष्ट्रात भ्रष्टाचार झाला आहे त्याचा उद्रेक झाला आहे, या शब्दांत उद्धव ठाकरे यांनी महायुती सरकारवर टीका केली. 

आगामी महापालिका निवडणुकीच्या पार्श्वभूमीवर उद्धव ठाकरे सक्रीय झालेले पाहायला मिळत आहे. उद्धव ठाकरे यांच्या शिवतीर्थ या राज ठाकरे यांच्या निवासस्थानी फेऱ्या वाढल्याचे पाहायला मिळत आहे. यातच एका कार्यक्रमात बोलताना उद्धव ठाकरे यांनी पुन्हा एकदा महायुती सरकारवर जोरदार हल्लाबोल केला. मराठी-हिंदीच्या मुद्द्यावर बोलताना उद्धव ठाकरे म्हणाले की, हिंदीचा आम्हाला द्वेष नाही. पण सक्ती का करता? जिकडे बॉम्बे असेल तिकडे आम्ही मुंबई करू, असा निर्धार उद्धव ठाकरेंनी व्यक्त केला. 

...तर त्यांना बाजूला करण्या शिवाय राहणार नाही

मुंबईकरांच्या प्रेमात हे मिठाचा खडा टाकत असतील तर त्यांना बाजूला करण्या शिवाय राहणार नाही. आत्ताच्या राज्यकर्त्यांपैकी एका नेत्याला विचारले की मुंबईचा महापौर मराठी होणार का? तो म्हणाला की, मुंबईचा महापौर हिंदू होणार. मग आजपर्यंत जे काही मराठी महापौर केले ते काही हिंदू नव्हते का? आम्ही अस्सल मराठीप्रेमी हिंदू आहोत. मुंबईचे मराठीपण हे लोक हळूवारपणे मारत चालले आहेत. आम्ही हिंदू आहोतच पण त्यासाठी आम्ही महाराष्ट्राचा बळी जाऊ देणार नाही, असे उद्धव ठाकरे म्हणाले.

दरम्यान, देशाचे रक्षण करणारे जे गीत आहे ना दिल्लीचे तख्त राखतो महाराष्ट्र माझा. तसा दिल्लीशी एकनिष्ठ असणारा आमचा महाराष्ट्र आहे. मधे त्यांचे नेते आले होते ते म्हणाले आयआयटी बॉम्बेमधे बॉम्बे आहे तेच बरे आहे. आमच्याकडून ते राहिले करायचे, पण आज तुम्हाला सांगतो जिथे जिथे बॉम्बे असेल तिथे मुंबई करू. कुठल्या शाळेचे नावही बदलायचे तर बदलू, असे ठाकरे यांनी सांगितले.