मुंबई मनपात उद्धव ठाकरेंनी किशोरी पेडणेकर यांच्याकडे सोपवली मोठी जबाबदारी, गटनेतेपदी निवड

मुंबई महानगरपालिकेच्या निवडणुकीत भाजपा आणि शिंदेसेनेच्या महायुतीला कडवं आव्हान देत उद्धवसेनेने ६५ जागांवर दणदणीत विजय मिळवला होता. या विजयानंतर उद्धवसेनेने महापौर आणि इतर पदांच्या निवडणुकीसाठी मोर्चेबांधणी सुरू केली आहे. त्या पार्श्वभूमीवर आज उद्धवसेनेच्या निवडून आलेल्या सर्व नगरसेवकांनी आज आपल्या गटाची नोंदणी केली आहे. तसेच पक्षाच्या ज्येष्ठ नेत्या आणि माजी महापौर किशोरी पेडणेकर यांची मुंबई महानगरपालिकेतील उद्धवसेनेच्या गटनेतेपदी निवड करण्यात आली आहे.

या निवडीनंतर प्रसारमाध्यमांशी बोतलाना किशोरी पेडणेकर यांनी सांगितले की, मुंबईच्या महापौरपदाबाबत उद्धव ठाकरे जो निर्णय घेतील तो आम्हाला मान्य असेल. तसेच महापौरपदासाठी आमचे प्रयत्न सुरू आहेत, असेही त्यांनी सांगितले. 

आमच्यावर कायम संकटं येत राहिली आहेत. पण त्या संकटांना सामोरे जायला आम्ही तयार आहोत. तसेच सभागृहात विरोधकांची पॉवर दाखवण्यापेक्षा मुंबईच्या भल्या करिता जे काही करता येईल, ते आम्ही करू, असेही किशोरी पेडणेकर यांनी सांगितले.