मुंबई: राज्याचे माजी मुख्यमंत्री आणि शिवसेना पक्षप्रमुख उद्धव ठाकरे (Uddhav Thackeray) यांचा ६२ वा वाढदिवस आहे. उद्धव ठाकरे यांचा यंदाचा वाढदिवस मोठ्या धुमधडाक्यात साजरा होत आहे. शिवसेनेचे कार्यकर्ते उद्धव ठाकरेंच्या भेटी घेत आहेत. राजकीय वर्तुळासह समाजातील सर्वच स्तरांतून उद्धव ठाकरे यांच्यावर वाढदिवसाच्या शुभेच्छांचा वर्षाव केला जात आहे. मात्र, यातूनही राज्यात मानापमान नाट्य आणि टीका-टिपण्णी होताना दिसत आहे. यातच आता पुत्र आदित्य ठाकरे (Aaditya Thackeray) यांनी आपल्या वडिलांना खास शब्दांत शुभेच्छा दिल्या आहेत. या शुभेच्छा देताना आदित्य ठाकरे यांनी उद्धव ठाकरे यांचा एक हटके पण कूल लूक असणारा एक विशेष फोटोही शेअर केला आहे.
एकनाथ शिंदे आणि देवेंद्र फडणवीस या दोघांनीही उद्धव ठाकरे यांना शुभेच्छा देताना एकसारखाच मजकूर ट्विट केला. यामध्ये उद्धव ठाकरे यांचा उल्लेख केवळ माजी मुख्यमंत्री असा केला आहे, पण त्याचवेळी उद्धव ठाकरे यांच्या शिवसेना पक्षप्रमुख ही उपाधीचा उल्लेख दोघांनीही टाळला. मात्र, राष्ट्रवादी काँग्रेसचे सर्वेसर्वा शरद पवार उद्धव ठाकरे यांच्या मदतीसाठी पुन्हा एकदा धावून आले. आदित्य ठाकरे यांनी इन्स्टाग्रामवर उद्धव ठाकरे यांना शुभेच्छा देणारी पोस्ट शेअर केली आहे.
माझ्या नेत्याला वाढदिवसाच्या खूप खूप शुभेच्छा
माझ्या वडिलांना आणि माझ्या नेत्याला वाढदिवसाच्या खूप खूप शुभेच्छा. ते मला रोजच मी करत असलेली प्रत्येक गोष्ट अधिक चांगल्या पद्धतीने करण्यासाठी प्रेरित करतात, तेही प्रामाणिकपणे आणि दयाळूपणे.' अशी पोस्ट आदित्य ठाकरेंनी इन्स्टाग्रामवर केली आहे. आदित्य ठाकरेंनी शेअर केलेल्या फोटोत उद्धव ठाकरे गॉगल लावून, जीन्स घालून अत्यंत हटके अंदाजात दिसत आहेत. तत्पूर्वी शरद पवार यांनीही उद्धव ठाकरे यांना वाढदिवसानिमित्त शुभेच्छा दिल्या. शिवसेना पक्षप्रमुख व राज्याचे माजी मुख्यमंत्री उद्धव ठाकरे यांना वाढदिवसानिमित्त हार्दिक शुभेच्छा! ठाकरे यांना दीर्घायु चिंतितो व नव्या भावी संकल्पांसाठी शुभकामना, अशा शब्दांत शरद पवार शुभेच्छा दिल्या.
दरम्यान, महाराष्ट्राचे माजी मुख्यमंत्री माननीय उद्धवजी ठाकरे यांना वाढदिवसाच्या हार्दिक शुभेच्छा. त्यांना निरोगी दीर्घायुष्य लाभो हीच आई जगदंबेच्या चरणी प्रार्थना, या शब्दांत एकनाथ शिंदे यांनी शुभेच्छा दिल्या आहेत. तर, माजी मुख्यमंत्री उद्धवजी ठाकरे यांना वाढदिवसाच्या अनेकानेक शुभेच्छा!मी त्यांना निरोगी जीवन आणि दीर्घायुष्य चिंतितो!, असे उपमुख्यमंत्री देवेंद्र फडणवीस यांनी शुभेच्छा संदेशात म्हटले आहे. यावरून आता आगामी काळात शिवसेनेचा पक्षप्रमुख कोण, यावरुन राजकीय संघर्ष तीव्र होणार असल्याचे सांगितले जात आहे.