Shouting to Chief Minister Shiv Sena over blowing Udayan Raje's collar, fadanvis says | उदयनराजेंच्या 'कॉलर' उडवण्यावरुन मुख्यमंत्र्यांचा शिवसेनेला टोला, म्हणाले...
उदयनराजेंच्या 'कॉलर' उडवण्यावरुन मुख्यमंत्र्यांचा शिवसेनेला टोला, म्हणाले...

मुंबई - साताऱ्याचे माजी खासदार आणि छत्रपती शिवाजी महाराजांचे तेरावे वंशज उदयनराजे भोसले यांच्यावर शिवसेनेने सामनाच्या अग्रलेखातून निशाणा साधला आहे. शिवसेनेनं सामनाच्या अग्रलेखातून उदयनराजेंच्या कॉलर उडवण्यावरुन टीका केली आहे. आता, उदयनराजेंना शिस्त लागली आहे, भाजपात कॉलर उडवणे जमत नाही, असे शिवसेनेनं म्हटलं आहे. शिवसेनेच्या या अग्रलेखाबाबत मुख्यमंत्र्यांना प्रश्न विचारला असता, त्यांनी उदयनराजेंचं पुन्हा एकदा कौतुक केलं आहे. उदयनराजे हे 'मुक्त विद्यपीठ' आहेत, असे फडणवीस यांनी म्हटलंय. 

शिवसेनेनं उदयनराजेंना समज देताना, शिस्त, तत्व, संस्कार, नितिमत्त आणि साधनशुचिता या पंचसुत्रीवर भाजपाचा डोलारा उभा आहे. अमित शहा किंवा पंतप्रधान नरेंद्र मोदी व्यासपीठावर असताना शिट्या मारणे, कॉलर उडवणे, इतर नाट्यछटा करणे हे असले प्रकार भाजपाच्या शिस्तीत बसत नाहीत. शरद पवारांनी हे खपवून घेतले हा त्यांचा बेशिस्तपणा. पण, याची कल्पना देवेंद्र फडणवीस यांनी साताऱ्याच्या राजांना दिली असेल, असे म्हटले होते. त्यावर, मुख्यमंत्री देवेंद्र फडणवीस यांनी उत्तर दिले आहे. 

'सामना' हे केवळ वृत्तपत्र आहे, आपण सगळे पत्रकार आहात, अनेकजण लिहितात, प्रश्न विचारतात. मात्र, प्रत्येकाच्या प्रश्नाला मी उत्तर द्यायचं का? असा प्रतिप्रश्न फडणवीस यांनी पत्रकारांना केला. तसेच, उदयनराजे हे मुक्त विद्यापीठ आहेत. कॉलर उडवणे हे त्यांची स्टाईल आहे. त्यांना जिथं वाटतं तिथं ते कॉलर उडवतात. त्यांच्यासारखं प्रत्येकाला जमत नाही. ते व्यासपीठावर असले की तसं करत नाहीत. ते जनतेमध्ये, तरुणांमध्ये असल्यानंतरच तसं करतात. कारण, त्यांची ही स्टाईल तरुणाईला आवडते. मला कॉलर उडवणं जमतं का, अन् ते जमणारही नाही, असे म्हणत मुख्यमंत्र्यांनी उदयनराजेंच्या कॉलर उडविण्याचं समर्थन केलं आहे. 

दरम्यान, उदयनराजेंच्या भाजपा प्रवेशानंतर सोशल मीडियात चांगलीच चर्चा रंगली. कित्येकांनी भाजपाला उदयनराजे आणि उदयनराजेंना भाजपा झेपणार नाही, अशा शब्दात या प्रवेशाचं विश्लेषण केलं. तर, विधानसभा विरोधी पक्षनेते धनंजय मुंडेंनीही राज्याचे छत्रपती किती दिवस भाजपात राहतात हेच पाहायचंय, असे म्हणत त्यांच्या भाजपा प्रवेशावर टीका केली होती. 
 


Web Title: Shouting to Chief Minister Shiv Sena over blowing Udayan Raje's collar, fadanvis says
Get Latest Marathi News & Live Marathi News Headlines from Politics, Sports, Entertainment, Business and local news from all cities of Maharashtra.