मनपा निवडणुकीच्या रिंगणात उमेदवारांची गळती; सर्वाधिक घसरण कुठे, कोणत्या महापालिकेत किती घट?

राज्यातील २९ महापालिकांच्या निवडणुकांची रणधुमाळी सध्या जोरदार सुरू आहे. सगळ्या महापालिकांमधील लढतीचे अंतिम चित्रही स्पष्ट झालेले आहे.

लोकमत न्यूज नेटवर्क, मुंबई : राज्यातील २९ महापालिकांच्या निवडणुकांची रणधुमाळी सध्या जोरदार सुरू आहे. सगळ्या महापालिकांमधील लढतीचे अंतिम चित्रही स्पष्ट झालेले आहे. परंतु, गेल्या निवडणुकांच्या तुलनेत यंदाच्या निवडणुकांत राज्यातील बहुतांशी महापालिकांमध्ये उमेदवारांची संख्या मोठ्या प्रमाणावर घटल्याचे चित्र आहे. 

मागील निवडणुकीच्या तुलनेत काही शहरांत ही घसरण ३५ ते ४० टक्क्यांपर्यंत पोहोचली आहे. स्थानिक स्वराज्य संस्थांमधील राजकारण, निवडणूक खर्च, पक्षीय गणिते आणि प्रशासकीय अनिश्चितता यांचा थेट परिणाम लोकशाही सहभागावर होत असल्याचे हे आकडे सूचित करतात.

सर्वाधिक घसरण पनवेलमध्ये 

या आकडेवारीनुसार सर्वाधिक घसरण पनवेल येथे दिसून येते. पनवेल महापालिकेच्या मागील निवडणुकीत ४१८ उमेदवार रिंगणात होते. यंदा ही संख्या २५५ वर आली असून ३९ टक्के घट नोंदवली गेली आहे. त्यापाठोपाठ कोल्हापूर (३५.८०%), कल्याण-डोंबिवली (३४.८०%) आणि नवी मुंबई (२६.५०%) या शहरांचा क्रम लागतो. राज्याची राजधानी मुंबई येथेही उमेदवारांची संख्या २,२७५ वरून १,७०० वर आली असून सुमारे २५.३० टक्के घट झाली आहे. भिवंडी-निजामपूर आणि चंद्रपूर येथील महापालिकांमध्ये मात्र उमेदवार संख्येतील घट तुलनेत कमी अर्थात ५ टक्क्यांखाली आहे.  

उमेदवार संख्येत कोणत्या महापालिकेत किती घट? 

महानगरपालिका	मागील निवडणूक	२०२६ निवडणूक	घट (%)
पनवेल	४१८	२५५	३९.००
कोल्हापूर	५०९	३२७	३५.८०
कल्याण–डोंबिवली	७५०	४८९	३४.८०
नवी मुंबई	६७९	४९९	२६.५०
मुंबई	२,२७५	१,७००	२५.३०
मालेगाव	३७४	३०१	१९.५०
अकोला	५७९	४६९	१९.००
ठाणे	८०५	६५६	१८.५०
अहिल्यानगर	३३९	२८३	१६.५०
सांगली–मिरज–कुपवाड	४५१	३८१	१५.५०
नांदेड–वाघाळा	५७८	४९१	१५.१०
मीरा–भाईंदर	५०९	४३५	१४.५०
नागपूर	१,१३५	९९३	१२.५०
लातूर	४०७	३५९	११.८०
नाशिक	८२१	७३५	१०.५०
पिंपरी–चिंचवड	७७३	६९२	१०.५०
धुळे	३५५	३२०	९.९०
उल्हासनगर	४७९	४३२	९.८०
सोलापूर	६२३	५६४	९.५०
छत्रपती संभाजीनगर	९३३	८५९	७.९०
भिवंडी–निजामपूर	४६०	४३९	४.६०
चंद्रपूर	४६०	४५१	२.००