तोतया पोलिसांनी केली १३ लाखांची चोरी

देवनार पोलिसांनी गोवंडी परिसरातून घेतले ताब्यात

मुंबई: पोलिस असल्याची बतावणी करून नागरिकांकडून जबरी चोरी करणाऱ्या तिघा आरोपींना देवनार पोलिसांनी गोवंडी परिसरातून तत्काळ ताब्यात घेतले आहे. या कारवाईत आरोपींकडून १३ लाख रुपयांची रोख रक्कम, बनावट नंबरप्लेट असलेली कार व पोलिसी काठ्या जप्त करण्यात आल्या आहेत.

गोवंडी येथील के. डी. जंक्शन, करबला मशीदजवळ येथे काही जण पोलिसांच्या काठ्यांसह एका वाहनचालकाशी वाद घालत असल्याचे देवनार पोलिसांच्या पथकाच्या निदर्शनास आले. संशय आल्याने पोलिसांनी हस्तक्षेप करत कारची तपासणी केली. यावेळी प्रवीण पांडे, निसार अहमद ऊर्फ सलीम शेख व संजय दुबे या तिघांना ताब्यात घेण्यात आले.

मुद्देमाल हस्तगत तक्रारदार 

अनिता मिरांडा यांनी पोलिस असल्याची बतावणी करून आरोपींनी आपल्याकडून १३ लाख रुपये लुटल्याची माहिती दिली. पोलिसांनी आरोपींकडून संपूर्ण रक्कम व साहित्य जप्त केले असून पुढील तपास सुरू आहे