Rahul Narvekar Viral Video, Mumbai BMC Election 2026: विधानसभेचे अध्यक्ष राहुल नार्वेकर यांनी पदाचा गैरवापर करत केलेले वर्तन हा आदर्श आचारसंहितेचा भंगच आहे. या घटनेचे सीसीटीव्ही फुटेज नष्ट केले आहे. निवडणूक आयोग प्रामाणिक नाही हे दिसत आहे. निवडणूक आयोगाने जनाची नाही तर मनाची तरी बाळगून आतापर्यंत गुन्हा दाखल करायला हवा होता, पण आयोग हा भाजपाच्या दावणीला बांधलेला आहे हे पुन्हा अधोरेखित होत आहे, अशी खरमरीत टीका काँग्रेस प्रदेशाध्यक्ष हर्षवर्धन सपकाळ यांनी केली.
"विधानसभा अध्यक्ष, विधान परिषदेचे सभापती, लोकसभा अध्यक्ष, राज्यसभा सभापती, राज्यपाल यांनी अराजकीय भूमिका घ्यायची असते. ते एका अत्यंत महत्वाच्या संवैधानिक पदावर असतात. पण राहुल नार्वेकर हे गुंड, मवाल्यासारखे वागले. विरोधी पक्षाच्या व्यक्तीला दमदाटी केली. त्यांची देहबोली, वर्तन व दमदाटी ही अत्यंत खालच्या पातळीवरची होती, ही शोकांतिका आहे. आपल्या कुटुंबातील व्यक्ती बिनविरोध निवडून यावेत यासाठी ते निवडणूक निर्णय अधिकाऱ्यांचा दरवाजा अडवून थांबले होते. विरोधकांना अर्ज भरू न देणे हे त्यांचे वर्तन अशोभनीय असून त्यांनी पदाचा गैरवापर केला आहे," असा आरोप सपकाळ यांनी केला.
"हरिभाऊ राठोड हे माजी खासदार आहेत. त्यांना धमकावणे, त्यांची सुरक्षा काढून घेण्याचे निर्देश देणे हा काय प्रकार आहे. विधानसभेचे अध्यक्ष म्हणून ते आदेश देतात, नार्वेकर स्वतःला संविधानापेक्षा मोठे समजायला लागले आहेत. निवडून आल्यानंतर घोडेबाजार होतो हे पाहिले होते. पण आता निवडणुकीच्या आधीच, 'जिसकी लाठी उसकी भैंस' प्रकार सुरु झाला आहे. जे बिनविरोध आले, ते लोकप्रिय आहेत म्हणून नाही. निवडणुका म्हणजे लोकशाही, मतदान पण हे चक्रच खिळखिळे करण्यात येत आहे आणि याचे देशाला गंभीर परिणाम भोगावे लागतील", अशी चिंता सपकाळ यांनी व्यक्त केली.
अजित पवारांच्या पत्रकार परिषदेबाबत...
उपमुख्यमंत्री अजित पवार यांच्या ७० हजार कोटी रुपयांच्या भ्रष्टाचारावरच्या प्रश्नावर बोलताना काँग्रेस प्रदेशाध्यक्ष म्हणाले की, सत्तेतील लोक भ्रष्ट आहेत, त्यामुळे कोणीच कोणावर कारवाई करू शकत नाही आणि कुणी सत्तेतून बाहेरही पडत नाहीत. पण त्यांच्या बोलण्यातून असे दिसते की अजित पवार यांनी मात्र नरेंद्र मोदी व फडणवीस यांनाच आव्हान दिले आहे, असे सपकाळ म्हणाले.
"केंद्रीय मंत्री मुरलीधर मोहोळ यांनी कुख्यात गुंड निलेश घायवळला पासपोर्ट मिळवून देण्यासाठी मदत केल्याचा खुलासा उपमुख्यमंत्री अजित पवार यांनी केला. हा अत्यंत गंभीर प्रकार असून पासपोर्ट कायदा, १९६७चा भंग आहे. कुख्यात गुंडास परदेशात जाण्यास मदत करणे हा राष्ट्रीय सुरक्षेला धोका निर्माण करणे आहे. त्यामुळे मुरलीधर मोहोळ यांचा तात्काळ राजीनामा घेऊन या संपूर्ण प्रकरणाची सीबीआय चौकशी केली पाहिजे," अशी मागणीही त्यांनी केली.
Web Summary : Congress slams Speaker Narvekar's conduct as unbecoming, alleging misuse of power during Mumbai BMC elections. They accuse him of threatening opponents, obstructing nominations, and aiding a criminal with passport issues, demanding investigation and resignation.
Web Summary : कांग्रेस ने अध्यक्ष नार्वेकर के आचरण को अनुचित बताया, मुंबई बीएमसी चुनावों के दौरान सत्ता के दुरुपयोग का आरोप लगाया। उन्होंने विरोधियों को धमकाने, नामांकन में बाधा डालने और एक अपराधी को पासपोर्ट मुद्दों में मदद करने का आरोप लगाया, जांच और इस्तीफे की मांग की।