आठ वर्षांच्या चिमुरडीचा डम्परखाली चिरडून मृत्यू; संतप्त नागरिकांचा रास्ता रोको, चालकाला अटक

कांदिवली-चारकोप भागात मंगळवारी दुपारी घडली दुर्घटना

लोकमत न्यूज नेटवर्क, मुंबई: कांदिवली-चारकोप भागात मंगळवारी दुपारी डम्परखाली चिरडून आठ वर्षांच्या शाळकरी मुलीचा मृत्यू झाला. कृतिका सुनील चौहान (८) असे तिचे नाव आहे. या घटनेनंतर संतप्त नागरिकांनी रास्ता रोको केला. त्यानंतर, पोलिसांनी चालकाला ताब्यात घेतले आहे.

कृतिकाचे कुटुंब गणेशनगरमध्ये राहते. ती महापालिका शाळेत इयत्ता पहिलीत होती. तिच्या आईची नुकतीच प्रसूती झाल्यामुळे ती तिला शाळेत सोडायला आली नव्हती. त्यामुळे कृतिका मैत्रिणींसह ऑस्कर रुग्णालयाच्या मागे असलेल्या शाळेत निघाली होती. गणेशनगरमधील आयएमपी सिग्नलजवळ रस्ता ओलांडताना एका कन्स्ट्रक्शन कंपनीच्या डम्परखाली ती चिरडली आणि जागेवरच गतप्राण झाली.

अपघाताची वार्ता संपूर्ण परिसरात वाऱ्यासारखी पसरल्याने संतप्त झालेल्या स्थानिक नागरिकांनी रस्ता अडवला. या घटनेची माहिती मिळताच, चारकोप पोलिसांसह कांदिवली पोलिस ठाण्यातील अधिकारी दाखल झाले. त्यानंतर, जखमी कृतिकाला रुग्णालयात नेण्यात आले, तसेच पोलिसांनी संतप्त जमावाला नियंत्रणात आणले आणि घटनास्थळी पोलिसांचा मोठा बंदोबस्त लावण्यात आला.