हॉटेलमधील जेवण महागणार? एलपीजी दरवाढीचा मोठा फटका

कधी बंद, कधी मर्यादित वेळेत सेवा, मेन्यूमध्ये बदल आणि पर्यायी स्वयंपाक पद्धतींचा अवलंब यामुळे खर्चात वाढ

मुंबई : युद्धाचा थेट परिणाम आता हॉटेल आणि रेस्टॉरंट व्यवसायावर दिसू लागला आहे. एलपीजी सिलिंडरच्या दरवाढीसह एकूण खर्चात सुमारे २० टक्क्यांनी वाढ झाल्याने रेस्टॉरंटमधील पदार्थाच्या किमती वाढण्याचे संकेत 'हॉटेल अॅड रेस्टॉरंट असोसिएशन ऑफ वेस्टर्न इंडिया'ने दिले आहेत.

कधी बंद, कधी मर्यादित वेळेत सेवा, मेन्यूमध्ये बदल आणि पर्यायी स्वयंपाक पद्धतींचा अवलंब यामुळे खर्चात वाढ झाली आहे. त्यातच सरकारने गॅसच्या दरात केलेली वाढ ही 'दुष्काळात तेरावा महिना' ठरली, असे प्रवक्ते प्रदीप शेट्टी यांनी म्हटले आहे.

परिस्थिती अधिक बिकट 

व्यवसायातील उलाढाल घटली असताना खर्च झपाट्याने वाढत आहे. त्यामुळे मेन्यूचे दर वाढविण्याशिवाय पर्याय नाही. एलपीजी दरवाढीने परिस्थिती अधिकच बिकट केली आहे. आधीच कमी झालेल्या नफ्यावर अतिरिक्त दबाव आल्याने हॉटेल व्यावसायिकांना दरवाढीचा निर्णय घ्यावा लागू शकतो.