मारुती संस्थानात आजपासून मूर्ती प्रतिष्ठापना वर्धापन व जन्मोत्सव सोहळा

विविध धार्मिक विधी व सांस्कृतिक कार्यक्रमांचे आयोजन करण्यात आले आहे.

लोकमत न्यूज नेटवर्क, पणजी : बोक द व्हाक-पणजी येथील श्री मारुती संस्थानात श्री महारुद्र हनुमान मूर्ती प्रतिष्ठापनेचा द्वितीय वर्धापन दिन व जन्मोत्सव सोहळा ३१ मार्च ते २ एप्रिलदरम्यान मोठ्या उत्साहात साजरा करण्यात येणार आहे. यानिमित्त विविध धार्मिक विधी व सांस्कृतिक कार्यक्रमांचे आयोजन करण्यात आले आहे.

३१ रोजी वर्धापन दिनानिमित्त सकाळी विविध धार्मिक विधी पार पडतील. दुपारी महाप्रसादाचे आयोजन करण्यात आले असून सायंकाळी श्रींची पालखीतून मिरवणूक काढण्यात येणार आहे. 

१ एप्रिल रोजी सकाळी श्री महारुद्र हनुमान मूर्तीला अभिषेक करण्यात येईल. दुपारी तीर्थप्रसाद वाटप होणार असून सायंकाळी ७ वाजता परिसरातील महिला व मुलांसाठी विविध स्पर्धांचे आयोजन करण्यात आले आहे. रात्री ८ वाजता सिद्धकला मोहक सांस्कृतिक नृत्याचा कार्यक्रम सादर होणार आहे.

२ रोजी सकाळी ६ वाजता हनुमान जन्मोत्सव सोहळा पार पडणार असून दुपारी महाप्रसाद दिला जाणार आहे. सायंकाळी चिराग दीपक त्रिपाठी व सहकलाकारांच्या भजनाचा कार्यक्रम होणार आहे. तसेच रात्री ८ वाजता आरत्या, तीर्थप्रसाद व परिसरातील महिला व मुलांसाठी विविध स्पर्धाचे आयोजन करण्यात आले आहे. या वर्धापन दिन व जन्मोत्सव सोहळ्यात भाविकांनी मोठ्या संख्येने सहभागी व्हावे, असे आवाहन मंदिर समितीचे अध्यक्ष नरेश उसगावकर, सचिव विजय हर्लणकर व खजिनदार विनोद परब यांनी केले आहे.