‘परतु’ला तीन नामांकने

यंदा असलेल्या ५३व्या राज्य मराठी चित्रपट पुरस्कारांसाठी नितीन अडसूळ दिग्दर्शित ‘परतु’ या मराठी चित्रपटाला तीन नामांकने मिळाली आहेत. यामध्ये उत्कृष्ट अभिनेत्री म्हणून स्मिता तांबे, उत्कृष्ट संगीतासाठी शशांक पोवार आणि प्रथमच चित्रपट निर्मितीत पदार्पण करणारे डेरेल कॉक्स, नितीन अडसूळ, क्लर्क म्याकमिलियन, रूपेश महाजन या सर्वांची नामांकनासाठी निवड झाली आहे. सत्यकथेवर आधारित ही कहाणी प्रेक्षकांच्यादेखील पसंतीस उतरली होती. रक्ताच्या नात्यापेक्षा सहवासाच्या, अनुभूतीच्या नात्याचे बंध अधिक बळकट असतात. अशाच जपलेल्या अनोख्या बंधाची व भावभावनांची हृदयस्पर्शी कथा म्हणजे ‘परतु’. ही कथा वास्तवात नगर जिल्ह्यात घडलेली सत्य घटना एका साध्या शेतकरी माणसाची आहे. एका घटनेने त्याचे आयुष्य कसे बदलते व राजस्थानच्या भूमीपर्यंत त्याचा प्रवास कसा होतो, हे सर्व या चित्रपटात अनुभवता येते. किशोर कदम, स्मिता तांबे, सौरभ गोखले, गायत्री सोहम, अंशुमन विचारे, नवनी परिहार, राजा बुंदेला, रवी भारतीय आणि बालकलाकार यश पांडे आदी कलाकारांचा या चित्रपटात समावेश आहे.