सोनी सब वाहिनीवर 'माय नेम इज लखन' ही मालिका लवकरच दाखल होत आहे. तर या मालिकेत अभिनेता संजय नार्वेकर लकी भाईच्या भूमिकेत पाहायला मिळणार आहे. या मालिकेत एका तरुणाने सुधारणेच्या मार्गावर जाण्याच्या केलेल्या प्रयत्नांची कथा पाहायला मिळणार आहे.
याबाबत संजय नार्वेकर अर्थात लकी भाई म्हणाला, “ही मालिका विनोद, रोमान्स आणि अॅक्शनचा मिलाफ असणार आहे. काहीतरी वेगळे देण्याचा प्रयत्न करताना याला थोडा फिल्मी टचही देण्यात आला आहे. प्रेक्षकांचे मनोरंजन करण्यासाठी आम्ही सगळ्यांनीच सर्वोत्तम प्रयत्न केले आहेत. त्यामुळे तुम्ही सर्वांनी आमची मालिका अवश्य बघावी अशी विनंती मी करत आहे. तुम्हांला मालिका आवडली तर आमचे कौतुक करा आणि जर आम्हीकाही चुका केल्या असे तुम्हांला वाटत असेल तर अवश्य आमचे कान पकडा. पण त्यासाठी कृपया माय नेम इज लखनही मालिका बघा.”