मराठी चित्रपटसृष्टीतील सुपरस्टार अंकुश चौधरी तब्बल १५ वर्षांनंतर छोट्या पडद्यावर दमदार एण्ट्री करण्यासाठी सज्ज झाला आहे. स्टार प्रवाहवर २१ ऑगस्टपासून सुरु होणाऱ्या ‘मी होणार सुपरस्टार’ या डान्स रिएलिटी शोमध्ये तो सुपर जजच्या भूमिकेत दिसणार आहे. संपूर्ण महाराष्ट्रातील टॅलेण्ट या डान्सच्या मंचावर अवतरणार आहे. नृत्याचे वेगवेगळे प्रकार तितक्याच हटके पद्धतीने मी होणार सुपस्टारच्या मंचावर सादर होणार आहेत. त्यामुळे स्पर्धा अटीतटीची आहे. या स्पर्धकांमधून सुपरस्टार निवडण्याची जबाबदारी अंकुशच्या खांद्यावर आहे.
याबद्दल अंकुश चौधरी म्हणाला, तब्बल १५ वर्षांनंतर पुन्हा एकदा छोट्या पडद्याकडे वळताना खूप आनंद होतो आहे. विशेष म्हणजे मी महाराष्ट्राची नंबर वन वाहिनी स्टार प्रवाहसोबत पहिल्यांदाच जोडला जातोय आणि परिक्षकाची भूमिकाही पहिल्यांदाच पार पाडतोय. डान्स हा माझ्या अतिशय आवडीचा विषय आहे. या शोमध्ये जरी मी परीक्षक असलो तरी मी टीव्हीसमोर बसलेल्या प्रेक्षकांच्या प्रतिनिधीची जबाबदारी पार पाडणार आहे. फरक एवढाच असेल की प्रेक्षक या कार्यक्रमाचा आनंद घरबसल्या घेतील आणि मी प्रत्यक्ष घेईन.