असे म्हणतात की, प्रेमात वेडेपणा नसेल, तर ते प्रेम कसले! प्रेम जेव्हा कोणत्याही संस्कारांपासून मुक्त आपल्या सर्वांत निखळ स्वरूपात असते आणि कोणतेही नियम मानत नाही तेव्हा स्वच्छंदी आणि मनमोकळे असते. तशीच प्रेमकथा असलेली सीरिज बेबाकी ऑल्ट बालाजी झी 5 प्लॅटफॉर्मवर घेऊन आली आहे. यात कुशल टंडन प्रियकराच्या भूमिकेत दिसणार आहे. बेबाकी ही गोष्ट आहे सुफीयान अब्दुल्ला आणि कैनात सहानी या दोन पूर्णपणे विरुद्ध आणि तेवढ्याच कणखर व हट्टी व्यक्तिरेखांची. शिमल्याच्या नयनरम्य पार्श्वभूमीवर घडणारी ही कथा दोन परस्परविरोधी व्यक्तिरेखांच्या आयुष्यांभोवती फिरणारी आहे. या दोन भूमिका कुशल टंडन आणि शिवज्योती राजपूत यांनी केल्या आहेत. सगळे काही सरळ मार्गाने चालले असतानाच सुफीयानचा मित्र इम्तियाज (करण जोतवानी) याच्या प्रवेशामुळे त्यांच्या आयुष्यांमध्ये एक अनपेक्षित वळण लागते. या तिघांमधील नातेसंबंध खूपच विचित्र वाटेवर जातात. या अफलातून त्रिकुटासोबत मालिकेत प्रतीक सहजपाल, इशान धवन, माहिर पांधी, सलोनी व्होरा, अदिती वत्स, जुहैना अहसाल असे अनेक कलावंत आहेत. शिवाय, कृतिका देसाई, सुचित्रा पिल्लई, अनन्या खरे, मोहित चौहान, समीर मल्होत्रा, इंद्रनील भट्टाचार्य यासारखे कलाकार मुख्य भूमिकेत दिसणार आहेत.
कुशल टंडनच्या 'बेबाकी'ची होतेय चर्चा, दिसणार प्रियकराच्या भूमिकेत
By ऑनलाइन लोकमत | Published: September 01, 2020 7:41 PM