टीव्हीवर प्रचंड लोकप्रिय ठरलेल्या ‘महाभारत’ या मालिकेत पितामह भीष्माची भूमिका साकारणारे अभिनेता मुकेश खन्ना यांनी आपल्या अभिनयाने सर्वांच्याच मनात एक वेगळे स्थान निर्माण केले आहे. आज (२३ जून) मुकेश खन्ना यांचा वाढदिवस. ‘शक्तिमान’ या मालिकेमुळे मुकेश खन्ना टेलिव्हिजनवरील बच्चेकंपनीचे आवडते सुपरहिरो बनले आणि घराघरात पोहोचले. त्यापूर्वी भीष्म पितामह सारखी कर्मठ भूमिका साकारून त्यांनी सर्वांचे लक्ष वेधून घेतले. भीष्म पितामहची भूमिका मुकेश यांना कशी मिळाली, यामागे एक इंटरेस्टिंग किस्सा आहे. खुद्द मुकेश खन्ना यांनी एका मुलाखतीत हा किस्सा ऐकवला होता.
‘महाभारत’ या मालिकेत भीष्म पितामह यांची जबरदस्त भूमिका साकारणा-या मुकेश खन्ना यांना सर्वात आधी दुर्योधनच्या भूमिकेसाठी विचारण्यात आले होते. परंतु मुकेश खन्ना यांनी ही भूमिका साकारण्यासाठी नकार दिला होता. कारण त्यांना निगेटीव्ह भूमिका साकारायची नव्हती. खरे तर मुकेश खन्ना ‘महाभारत’ या मालिकेत अर्जुनाची भूमिका साकारू इच्छित होते. पण ही भूमिका त्यांच्या हातून निसटली.
यानंतर त्यांना गुरु द्रोणाचार्याच्या भूमिकेसाठी विचारणा झाली. ही भूमिका साकारण्यातही मुकेश खन्ना रस नव्हता. पण तरीही नाराजीने का होईना त्यांनी या भूमिकेसाठी होकार दिला. पण ही भूमिकाही त्यांच्या हातून गेली. अर्थात यानंतर त्यांच्याकडे भीष्म पितामहची भूमिका चालून आली. मुकेश खन्ना यांनी आनंदाने ही भूमिका स्वीकारली. ही भूमिका त्यांनाच नाही तर त्यांच्या वडिलांनाही आवडली होती. याच एका भूमिकेने मुकेश यांच्या अ‍ॅक्टिंग करिअरला उभारी दिली.