'बिग बॉस 14'च्या घरातून तीनही तूफानी सिनिअर्स घराबाहेर पडले आहे. आता संपूर्ण घराचा ताबा नव्या स्पर्धकांकडे आहे. खेळातून बाद झालेले एजाज खान आणि पवित्रा पुनिया 'रेड झोन'मध्ये गेले आहेत. यानंतरच्या पहिल्याच टास्कमध्ये त्या दोघांना संचालकाची भूमिका पार पडायची होती. या दरम्यान पुन्हा एकदा या दोघांमध्ये वाद झालेला पाहायला मिळाला. तर, या सगळ्या वादांत स्पर्धक निशांत मलकानीने पहिला कॅप्टन होण्याचा मान पटकावला आहे.
संचालक असलेल्या पवित्रा आणि एजाजमध्ये स्पर्धकांमुळे वाद झाला आहे. एजाजच्या म्हणण्यानुसार रुबिना या टास्कमध्ये सगळ्यात शेवटी बाहेर आली, तर पवित्राच्या म्हणण्यानुसार अभिनव सगळ्यात शेवटी बाहेर आला आहे. भागाच्या सुरुवातीस हा टास्क सुरू करण्यात आला. मात्र, दोन्ही संचालकांच्या वादामुळे खेळ अडकून पडला होता. यानंतर अभिनवने आपणच सगळ्यात शेवटी बाहेर आल्याचे कबूल केले. तरीही एजाज स्वतःच्या मतावर ठाम होता. या गोंधळामुळे शेवटी 'बिग बॉस'ने त्यांना निर्णय घेण्याची ताकीद दिली. यानंतरही त्यांच्यात फरक न पडल्यामुळे अखेर बिग बॉसने या खेळाची सूत्रे आपल्या हातात घेतली. या खेळातून जास्मीन भसीन आणि अभिनव शुक्लाला बाद करण्यात आले.
रुबिना, जान आणि निशांतच्या प्लॅननुसार रुबिना या खेळातून बाहेर गेले आणि ठरल्याप्रमाणे कॅप्टन पद निशांत मलकानीला मिळाले. यानंतर निशांतला घरातील अनेक सुविधा वापरण्याचा अधिकार मिळाला आहे. निशांत कॅप्टन झाल्यानंतर निक्की तांबोळी खूप रडली आणि रेड झोनमध्ये पवित्राकडे गेली. त्यानंतर बिग बॉसने आदेश दिला की ग्रीन झोनमधील कोणताही स्पर्धक रेड झोनमध्ये जाणार नाही. त्यानंतर निक्कीला ग्रीन झोनमध्ये यायला सांगितले.