बॉर्डर या चित्रपटातील धर्मवीर या भूमिकेसाठी अक्षय खन्ना नव्हे तर या अभिनेत्याची करण्यात आली होती निवड

स्वातंत्र्य दिन, प्रजासत्ताक दिन म्हटला की, बॉर्डर हा चित्रपट कोणत्या ना कोणत्या वाहिनीवर आपल्याला पाहायला मिळतोच. आज स्वातंत्र्य दिनाच्या निमित्ताने या चित्रपटाविषयी जाणून घेऊया एक गुपित...बॉर्डर या चित्रपटात सनी देओल, अक्षय खन्ना, सुनील शेट्टी, जॅकी श्रॉफ आपल्याला प्रमुख भूमिकेत पाहायला मिळाले होते. या चित्रपटात लेफ्टनंट धर्मवीरची भूमिका अक्षय खन्नाने साकारली होती. पण तुम्हाला माहीत आहे का की, या भूमिकेसाठी जे पी दत्ता यांची पहिली चॉईस अक्षय नव्हता. या चित्रपटातील धर्मवीरची भूमिका सलमान खानने साकारावी असे जे पी दत्ता यांना वाटत होते आणि त्यामुळे त्यांनी या भूमिकेसाठी सलमान खानला विचारले देखील होते. पण सलमानने या चित्रपटात काम करण्यास नकार दिला.सलमानच्या नकारानंतर या भूमिकेसाठी अक्षय कुमारसोबत देखील बोलणे झाले होते. पण अक्षय देखील ही भूमिका साकारण्यास तयार नव्हता.अक्षयनंतर जे पी दत्ता यांनी अजय देवगणशी या भूमिकेबाबत चर्चा केली होती. पण मल्टीस्टारर चित्रपटात काम कऱण्यात अजयला रस नव्हता. सलमान, अक्षय आणि अजय यांनी चित्रपटात काम करण्यास नकार दिल्यानंतर जे पी दत्ता यांनी अक्षय खन्नाला या चित्रपटासाठी विचारले आणि अक्षय या चित्रपटात काम करण्यास तयार झाला. बॉर्डर या चित्रपटातील सगळ्याच भूमिका प्रचंड गाजल्या. त्यातही धर्मवीरची भूमिका प्रेक्षकांना अधिक आवडली होती. धर्मवीर या भूमिकेसाठी अक्षय खन्नाला फिल्मफेअरचा सर्वोत्तम पदार्पणाचा पुरस्कार देखील मिळाला होता.