- Janhavi Samantबॉलिवूडचा ‘दबंग खान’ सलमान खान याचा ‘ट्यूबलाईट’ हा सिनेमा नुकताच प्रेक्षकांच्या भेटीस आला आहे. या चित्रपटाच्या निमित्ताने सलमानने ‘सीएनएक्स मस्ती’च्या संपादक जान्हवी सामंत यांच्या प्रश्नांना मनमोकळी उत्तरे दिली. प्रश्न-उत्तरांच्या स्वरूपातील सलमानची ही मुलाखत खास आमच्या वाचकांसाठी...
सलमान, तुझा ‘ट्यूबलाईट’ हा सिनेमा नुकताच प्रदर्शित झालाय. या चित्रपटात प्रेक्षकांना काय वेगळे पाहायला मिळत आहे?- ‘ट्यूबलाईट’ हा माझ्या आत्तापर्यंतआलेल्या चित्रपटांपेक्षा संपूर्णत: वेगळा चित्रपट आहे. वेगळी कथा, वेगळी भूमिका. भारत-चीन युद्धाची पार्श्वभूमी असलेला हा चित्रपट मुळात दोन भावांची कथा आहे. लहानपणापासून सावलीसारखे एकत्र राहणारे आणि एकमेकांवर जीवापाड प्रेम करणारे दोन भावांची ताटातूट होते. मी यात लक्ष्मण नावाचे पात्र रंगवले आहे. लक्ष्मणचा भाऊ भरत भारतीय सैन्यात भरती होतो. मात्र त्याचा काही ठावठिकाणा लागत नसल्याचे पाहून लक्ष्मण त्याच्या शोधात निघतो. लोक त्याला ‘ट्यूबलाईट’ म्हणून हिणवतात, तुझा भाऊ परत येणार नाही असे सांगतात, परंतु लक्ष्मणचा विश्वास असतो की, तो त्याच्या भावाला परत आणणारच. केवळ भावालाच नाही. युद्ध संपेल आणि सगळे जवान आपआपल्या घरी परततील, हा त्याला विश्वास असतो. याच विश्वासाची, नात्यांची, भावभावनांची कथा ‘ट्यूबलाईट’मध्ये दिसणार आहे.‘बजरंगी भाईजान’ या तुझ्या चित्रपटातून एक वेगळा संदेश दिला गेला होता. मानवता हा खरा धर्म आहे, हे तू मानतोस. याबद्दल आणखी काय सांगशील?- बिल्कुल, मानवता हाच खरा धर्म आहे. देशांच्या सीमेवर एकमेकांच्या छातीत गोळ्या झाडून, एकमेकांना ठार मारून, युद्ध करून काहीही मिळवता येणार नाहीय. कारण सीमेवर एक जवान मरत नाही तर त्याच्यासोबत त्याचे कुटुंबही मरते. जवान आपले असोत वा त्यांचे. त्यांच्यामागे उरणारे त्यांचे कुटुंब पोरके होते. आपल्या व्यक्तीला गमावण्याचे दु:ख हे मरणापेक्षा कमी नसते.तू तुझ्या कुटुंबाप्रति कमालीचा प्रोटेक्टिव्ह आहेस. असे का?- मी एकटा नाही तर प्रत्येक पुरूष आपल्या कुटुंबाप्रति प्रोटेक्टिव्ह असतो. माझ्याकडे खूप आहे, म्हणून मी सगळ्यांची काळजी करतोय, अशातलाही भाग नाही. माझ्याकडे काहीही नाही. उलट मला माझ्या कुटुंबाने घडवलेय. माझ्यातील किंचित काही चांगले असेल तर ती माझ्या कुटुंबाची पुण्याई आहे. मी जसा माझ्या कुटुंबाप्रति प्रोटेक्टिव्ह आहे. तसेच माझ्या कुटुंबातील प्रत्येक व्यक्ती माझ्याप्रति कमालीची प्रोटेक्टिव्ह आहे.भाऊ-बहिणीच्या नात्यावर अनेक सिनेमे आलेत. त्या तुलनेत भावांच्या नात्यांवर आधारित सिनेमे तसे मोजकेच. तुला दोन भाऊ आहेत. त्यांच्या तू बराच जवळ आहेस. दोन भावांमधील नाते शब्दांत कसे मांडशील?- आम्ही सगळी भावंडं कशी मोठे झालोत, हे आम्हालाही कळले नाही. आम्ही भाऊ भाऊ असण्यापेक्षा एकमेकांचे मित्र म्हणूनच अधिक वाढलो. तुझे मित्र, माझे मित्र असे आमच्यात काहीही नव्हते, आजही नाही. आमच्या घरी कायम, पाहुण्यांचा राबता असायचा, आजही असतो. वडिलांना फारसे नातेवाईक नाही. पण माझ्या आईचे म्हणाल तर महाराष्ट्राच्या कानाकोपऱ्यात तिचे नातेवाईक आहेत आणि हे सगळे आठवड्यातून दोनदा तरी भेटतातच भेटतात. आम्ही अशा गोतावळ्यात मोठे झालोत आणि कदाचित म्हणून मित्र म्हणून वाढलोत.
आज तू स्टार आहेस. या प्रवासात कुठली अशी एक गोष्ट तुला पे्ररणा देत आलीयं?- चाहत्यांचे प्रेम. माझा चित्रपट रिलीज होतो आणि चाहते ते पाहायला चित्रपटगृहांत येतात, ही माझ्यासाठी सगळ्यांत प्रेरणादायी बाब आहे. चाहत्यांचे प्रेम मला नवनवे चित्रपट करण्याची, त्यासाठी कठोर मेहनत करण्याची प्रेरणा देते. चाहते आहेत, म्हणून मी आज इथे आहे.‘मैनें प्यार किया’ या सुपरहिट सिनेमाने तुझ्या करिअरची सुरुवात झाली. पण तरिही कुठला एक सिनेमा तुझ्या करिअरचा टर्निंग पॉर्इंट होता, असे तुला वाटते?- टर्निंग पॉर्इंट, असे म्हणता येणार नाही. ‘करण अर्जून’, ‘वॉन्टेड’, ‘वीर’, ‘तेरे नाम’ तर ‘बजरंगी भाईजान’ पर्यंत असे सगळेच चित्रपट अनेक अर्थाने माझ्या आयुष्यातील टर्निंग पॉर्इंट ठरलेत. या प्रत्येक चित्रपटाने अभिनेता म्हणून मला घडवले. मला शिकवले.आता तुझ्या पुढच्या प्लानमध्ये काय काय नवे असणार आहे?- ‘ट्यूबलाईट’ नंतर माझा ‘टायगर जिंदा है’ हा चित्रपट येतो आहे. या चित्रपटासाठी मी बरीच मेहनत घेतलीय. अनेक अ‍ॅक्शनदृश्यांची भरमार असलेला हा सिनेमा तुम्ही पाहू शकाल. यानंतर मी एक डान्स मुव्ही करतोय. मला डान्स येत नाही, हे अख्ख्या जगाला माहितीय. तरिही मी रेमो डिसूजाचा हा चित्रपट करणार आहे.सुपरस्टार असण्याचा सगळ्यात मोठा फायदा काय असे, तुला वाटते?- मी कुठला आलोय सुपरस्टार. मी केवळ एक सामान्य माणूस आहे. मी काही नासाचा कुणी शास्त्रज्ञ नाही, जो चंद्रावर जाऊन आलाय. ही प्रसिद्धी, ग्लॅमर यामागे अनेकांची मेहनत आहेत. अनेकांचे मदतीचे हात आहे. माझ्या मते, पडद्यावर तुम्ही फक्त दिसता. त्या दिसण्यात माझे नाही तर माझा डारेक्टर, स्टोरी रायटर, साऊंड डिझाईनर, ड्रेस डिझाईनर, टेक्निशिअन, माझे को-स्टार, स्पॉट बॉय अशा सगळ्यांचे योगदान असते. त्याचे योगदान आणि देशातील अब्जावधी लोकांचे प्रेम ही माझी प्रेरणा आहे. हेच खरे सुपरस्टार आहेत.मराठी सिनेमाबद्दल तू काय सांगशील?- मी अलीकडे महेश मांजरेकरच्या एका चित्रपटासाठी गाणे गायले. रितेश देशमुखच्या एका मराठी चित्रपटात मी अतिथी भूमिकेतही दिसलो. मराठी चित्रपट निर्मितीची माझी योजना आहे. मराठी सिनेमाचे अलीकडे बरीच झेप घेतली आहे. ‘यल्लो’, ‘बालक पालक’ असे अनेक मराठी सिनेमे मी पाहिलेत. मराठी सिनेमा येत्या काळात याहीपेक्षा अधिक उंचीवर जाईल, याचा मला विश्वास आहे.आमच्या ‘www.cnxmasti.com’ या संकेतस्थळाला भेट देणाऱ्यांमध्ये अनेक अनिवासी भारतीय आहे. भारताबाहेरच्या तुझ्या या चाहत्यांना काय संदेश देऊ इच्छितोस?- भारताबाहेरही भारताची संस्कृती जिवंत ठेवणाऱ्या या चाहत्यांबद्दल माझ्या मनात अपार आदर आहे. आपल्या मायभूमीतील कलाकार, त्यांच्या कलाकृती, भारतीय सिनेमे यावर भरभरून प्रेम करणाऱ्या जगभरातील या चाहत्यांचे मी मनापासून आभार मानेल.