सैराट चित्रपट म्हटलं की डोळ्यासमोर येते ती आर्ची म्हणजेच अभिनेत्री रिंकू राजगुरू. या चित्रपटातून रिंकू राजगुरूने चित्रपटसृष्टीत पदार्पण केले. या चित्रपटातून एका रात्रीत ती लोकप्रिय झाली. या चित्रपटानंतर तिने कागर, मेकअप या मराठी चित्रपटात काम केले. त्यानंतर ती लारा दत्तासोबत हिंदी वेबसीरिज हंड्रेडमध्ये झळकली. तसेच ती आगामी काही हिंदी आणि मराठी प्रोजेक्टमध्ये काम करताना दिसणार आहे. तिला हिंदी आणि मराठी चित्रपटसृष्टीत आलेल्या अनुभवाबद्दल बोलताना मराठी चित्रपटसृष्टीत काम करताना आपलेपणा वाटल्याचे तिने सांगितले.
रिंकू राजगुरूने मराठी आणि हिंदी सिनेइंडस्ट्रीत काम केले आहे. तिला दोन्हीकडे काम करताना काय फरक जाणवला, हे विचारल्यावर ती म्हणाली की, वेगळ्या भाषेत आणि वेगळ्या लोकांसोबत काम करायला खूप मजा येते. त्यांची काम करण्याची पद्धत खूप वेगळी असते. सेटवरील वातावरण ही खूप वेगळे असते. हिंदी भाषा आपली नसल्यामुळे तितका आपलेपणा वाटत नाही. याउलट मराठी इंडस्ट्रीत काम करताना आपलेपणा वाटतो.