जिथे रिंकू राजगुरू तिथे गर्दी... हे आता जणू एक समीकरणच झालं आहे. मग एखादया चित्रपटाचे चित्रीकरण असो किंवा मग एखादा इव्हेंट.... रिंकूची एक झलक पाहण्यासाठी तिच्या चाहत्यांची गर्दी ही होतेच. मग त्याला 'मेकअप' चित्रपट तरी कसा अपवाद ठरेल? असाच काहीसा अनुभव मेकअप चित्रपटाच्या शूटिंगवेळी रिंकूला आला.
पुण्यातील खराडी गावामध्ये मेकअप चित्रपटाचे चित्रीकरण सुरु होणार असून रिंकू स्वतः येणार असल्याची बातमी गावात वाऱ्यासारखी पसरली आणि अख्खं गाव रिंकूला बघण्यासाठी चित्रीकरण स्थळी पोहोचले. या जमावामुळे चित्रीकरणात इतक्या अडचणी येत होत्या की चित्रीकरण अक्षरशः रद्द करण्याची वेळ आली.
या अनुभवाबद्दल दिग्दर्शक गणेश पंडित म्हणाले,' या दिवशी रिंकू गावात चित्रीकरणासाठी येणार असल्याची माहिती तिच्या चाहत्यांना मिळाली आणि त्यांनी शूटिंगच्या ठिकाणी तिला गराडाच घातला. रिंकूसोबत फोटो काढण्यासाठी सर्वांचीच धडपड सुरु होती. आमचं चित्रीकरण सुरू झालंच नाही, पण लोकांनी आपल्या फोनवर रिंकूचं चित्रीकरण मात्र केलं. एकंदरच सगळा गोंधळ सुरु होता. आमच्या टीममधील प्रत्येकाची ही गर्दी आटोक्यात आणण्याचा प्रयत्न सुरु होता, मात्र तो अयशस्वी ठरत होता. अखेर शूटिंग रद्द करून आम्ही रिंकूला हॉटेलवर नेण्याचा निर्णय घेतला. तर तिथेही काही वेगळी परिस्थिती नव्हती. '
त्यांनी पुढे सांगितले की, 'हॉटेलबाहेरही चाहत्यांची गर्दी रिंकूच्या प्रतीक्षेत पोहोचली होती. रात्रभर ही गर्दी तशीच उभी होती. मात्र रोजरोज चित्रीकरण थांबवणं शक्य नसल्यानं अखेर दुसऱ्या दिवशी योग्य खबरदारी घेऊन आम्ही चित्रीकरण सुरळीत पार पाडले.'
रिंकूला पाहण्यासाठी चाहत्यांनी गर्दी केल्याची ही पहिली वेळ नाही. अशा परिस्थितीचा सामना रिंकूला अनेकदा करावा लागतो. मात्र आज चाहत्यांच्या प्रेमामुळेच रिंकू इथंवर आल्याने रिंकूही आपल्या चाहत्यांना नाराज नाही करत.
येत्या ७ फेब्रुवारी रोजी प्रदर्शित होणाऱ्या 'मेकअप' या चित्रपटात रिंकू राजगुरू एका वेगळ्याच आणि नवीन रूपात प्रेक्षकांना पाहायला मिळणार आहे. या चित्रपटात तिच्यासोबत चिन्मय उदगीरकर, प्रतिक्षा लोणकर, मिलिंद सफई, राजन ताम्हाणे, सुमुखी पेंडसे, स्वाती बोवलेकर, तेजपाल वाघ यांच्याही प्रमुख भूमिका आहेत.