'माझ्या नवऱ्याची बायको' मालिकेत शनायाची भूमिका करणारी रसिका सुनील आणि ईशा म्हणजे अदिती द्रविड यांचा दोस्ताना सर्वश्रुत आहेच. आपला दोस्ताना कायम ठेवत पुन्हा एकदा बदमाशिया करण्यासाठी या दोघी सज्ज झाल्या आहेत. फक्त आता त्यांचा हा दोस्ताना येऊ घातलेल्या 'यू अँड मी' या नव्या व्हिडीओ अल्बमसाठी आहे. हा व्हिडिओ अल्बम ५ ऑक्टोबरला प्रेक्षकांच्या भेटीला येणार आहे. या गाण्याचा टीझर रसिकाने सोशल मीडियावर शेअर केला आहे.
'जरा सा कट्टा टाकू आता... जरासी बाते तेढीमेढी..., थोडासा किस्सा करू आता... थोडीशी यादे तेरी मेरी..., करू आम्ही मनमानिया... ऐसी है अपनी यारीया...' असे म्हणत रसिका सुनील आणि आदिती द्रविड, आपला दोस्ताना या अल्बमच्या माध्यमातून दाखवणार आहेत. या दोघींचा 'यू अँड मी' या अल्बमची व्हिडिओ पॅलेसने निर्मिती केली आहे. या टीझरमध्ये त्या दोघींची मैत्री दिसून येत असून त्यात त्या धमाल करत आहेत.
'यू अँड मी' या गाण्याची खासियत म्हणजे स्वत: आदिती द्रविड हिने हे गाणे लिहिले असून आदिती आणि रसिकानेच हे गाणे गायले आहे. या अल्बमच्या निमित्ताने रसिकाच्या गायकीची नवी ओळख प्रेक्षकांना होणार आहे. साई–पियुष यांनी या गाण्याला संगीतबद्ध केले आहे. फुलवा खामकर हिने या गाण्याचे नृत्यदिग्दर्शन केले आहे. छायांकन अमोल गोळे यांचे आहे. लोणावळा येथे चित्रित झालेल्या या एका गाण्यासाठी रसिका आणि आदिती यांनी १२ वेगवेगळे ड्रेस परिधान केले आहेत. अभिनयातल्या रंगानंतर रसिका आणि आदितीच्या संगीताचे सूर ही प्रेक्षक पसंतीस उतरतील अशी आशा आहे.