अखेर घटस्फोट!

अरबाज खान व मलायका अरोरा दोघेही पती-पत्नी आता कायदेशीररित्या विभक्त झाले आहेत. मुंबईच्या कौटुंबिक न्यायालयाने अलीकडेच दोघांच्याही कायदेशीर घटस्फोटास मंजुरी दिली. या दोघांचा विवाह १९९८ मध्ये झाला होता. गतवर्षी नोव्हेंबरमध्ये दोघांनीही परस्पर सामंजस्याने कौटुंबिक न्यायालयात घटस्फोटासाठी अर्ज दाखल केला. हा अर्ज मान्य करत, न्यायालयाने या दोघांच्या घटस्फोटावर शिक्कामोर्तब केले. त्यांचा मुलगा अरहान याची कस्टडी मलायकाला मिळाली आहे. तो मलायकाकडे राहिल. अरबाज त्याला कधीही भेटू शकेल. त्यांना बॉलिवूडमधील हॉट कपल मानले जाते. पण मागील काही काळापासून दोघेही एकमेकांपासून दुरावले होते. अखेर या नात्याची परिणीती घटस्फोटात झाली. कोर्टाच्या नियमानुसार घटस्फोटाचा अर्ज दिल्यावर पती-पत्नीचे समुपदेशन केले जाते. यानंतर दोघांना या निर्णयावर विचार करण्यासाठी कुलिंग आॅफ पिरियेड दिला जातो. या दरम्यान त्यांचा विचार बदलला व दोघांनी एकत्र राहण्यास संमती दर्शविली तर घटस्फोटाचा अर्ज रद्द होऊ शकतो. कुलिंग आॅफ पिरियेडमध्ये पती पत्नीच्या समुपदेशनाचे अनेक सेशन होतात. या सेशनदरम्यान दोघांनी मॅरेज काऊंसलरने विचारलेल्या प्रश्नांची समजूतदारपणे उत्तरे दिलीत आणि त्यांच्या घटस्फोटाचा मार्ग मोकळा झाला.