अभिनेता जॉन अब्राहम आणि मृणाल ठाकूर यांची मुख्य भूमिका असलेला ‘बाटला हाऊस’ हा चित्रपट नुकताच प्रेक्षकांच्या भेटीस आला असून या चित्रपटाला प्रेक्षकांचा खूपच चांगला प्रतिसाद मिळत आहे. या चित्रपटाचे खूपच चांगले प्रमोशन या चित्रपटाची टीम करत आहे. या चित्रपटाच्या प्रमोशनच्या निमित्ताने जॉन, मृणाल आणि रवी किशन कपिल शर्माच्या द कपिल शर्मा शो या कार्यक्रमात हजेरी लावणार आहेत. या कार्यक्रमात प्रेक्षकांचे भरभरून मनोरंजन होणार यात काहीच शंका नाहीये. ‘बाटला हाऊस’ मधील हे त्रिकूट त्यांचे चित्रपटाच्या शूटिंगच्या वेळेस घडलेले काही मनोरंजक किस्से या कार्यक्रमात सांगणार आहेत.
जॉन बरोबर झालेल्या संभाषणात कपिलने जॉनची आई फिरोजा इराणी त्यांच्या मुलाचा चित्रीकरणाच्यावेळी झालेला अपघात पाहून घाबरल्या होत्या अशी चर्चा मीडियात रंगली होती हे खरे आहे का असे जॉनला विचारले. त्यावर पुष्टी देत जॉन म्हणाला, “हो, हे खरे आहे. ‘टॅक्सी नं. 9211’ चित्रपटाच्या शूटिंगच्या वेळी एका अपघाताच्या दृश्यात मी रस्त्यावर गडगडत जातो आणि माझ्या आजूबाजूला गाड्या धावत आहेत असे दाखवायचे होते. योगायोगाने माझी आई तिच्या गाडीने सेटजवळून जात होती आणि तिला वाटले की मला खरोखर अपघात झाला आहे. ती गुजरातीमध्ये ओरडायला लागली, “मारो डिकरो-मारो डिकरो छे. सू थई गयू...” नंतर त्याने तिला शांत करत समजावून सांगितले की ते खरे नव्हते तर तो शूटिंग करत होता.
शो मध्ये पुढे मृणाल आणि रवी किशनदेखील त्यांच्या वैयक्तिक तसेच व्यवसायिक जीवनातील अनेक किस्से सांगत उपस्थितांना खळखळून हसवले.