अनेक मराठी कलाकारांनी आपल्या अभिनय कौशल्याच्या जोरावर बॉलिवूडमध्ये आपले स्थान निर्माण केले आहे. सोलापुरातल्या एका सधन कुटुंबात जन्म झालेल्या शशिकला यांचं बालपण ऐशोआरामात गेलं. बालपणापासूनच त्यांना नृत्याची आणि अभिनयाची आवड होती. सांस्कृतिक कार्यक्रमात सहभाग घेत त्यांनी ही आवड जोपासली. त्याचदरम्यान शशिकला यांच्या वडिलांचा व्यवसाय डबघाईला आला. त्यांचं कुटुंब रस्त्यावर आलं. काकांनीच हे कारस्थान रचलं होतं असं शशिकला यांनी एका मुलाखतीत सांगितलं होतं.
घरच्या परिस्थितीमुळे शशिकला यांच्या वडिलांनी मुंबई गाठली. मात्र तिथंही जम बसवणं त्यांना कठीण होऊ लागलं. त्यामुळेच शशिकला यांनी दुसऱ्यांच्या घरची धुणीभांडी करण्याची कामे केली. पुढे नूरजहाँ यांच्याशी शशिकला यांची ओळख झाली. त्यांचे पती शौकत रिझवी यांनी शशिकला यांना ‘झीनत’ चित्रपटात काम दिले. या भूमिकेसाठी त्यांना त्याकाळी २० रुपये मिळाले होते. या २० रुपयांत त्यांनी आपल्या भावंडाना नवीन कपडे घेतले, स्वतः ला २ साड्या घेतल्या. बऱ्याच वर्षानंतर अशी दिवाळी साजरी केली असल्याची आठवण त्यांनी सांगितली.
१९४७च्या जुगनू चित्रपटात दिलीप कुमार यांच्या बहिणीची भूमिका शशिकला यांनी साकारली. मात्र यानंतर काम मिळवण्यासाठी त्यांना संघर्ष करावा लागला. १९६२ साली आरती चित्रपटात निगेटिव्ह भूमिका शशिकला यांना मिळाली. या भूमिकेमुळे शशिकला यांनी पुढे कधीच चित्रपटात काम न करण्याचे ठरवले. मात्र चित्रपटाच्या दिग्दर्शकांनी शशिकला यांची समजूत काढून या भूमिकेसाठी तयार केले. आरती चित्रपटातील या खलनायिकेच्या भूमिकेमुळे त्यांच्या आयुष्याला कलाटणी मिळाली. फिल्मफेअरसारखे अनेक पुरस्कार त्यांना मिळाले.
छोट्या पडद्यावरील किसे अपना कहें, सोनपरी, जिना इसी का नाम है मालिकेतील त्यांच्या भूमिका गाजल्या. शशिकला आता ८६ वर्षाच्या झाल्या आहेत. आपली धाकटी मुलगी आणि नातवंड यांच्यासोबत त्या मुंबईत राहत आहेत.